Aizawl: Supreme Court thupek angin mobile sim card leh Aadhaar chu thlunzawm tur a ni a, hemi zawm hian Aizawl a prepaid leh postpaid sim card pechhuaktu company hrang hrang te pawhin hma an la \an. Zalen-in a biakzaunaah tunah hian Airtel chauhin sim card leh Aadhaar thlunzawm hna hi an la \an a. Airtel hotute chuan sim card leh Aadhaar thlunzawm hna chu May 30, 2017 a\ang khan an tan tih sawiin district dangah pawh an kalpui \an thu an sawi a. Sim card book tirha an hminga dah lo te tan pawh dahna hun remchang a ni tih sawiin Airtel hotute chuan pawisa chawi a ngaih loh thu leh an office-a Aadhaar card leh an phone hmanlai kengin mipuite chuan an tihfel mai theih thu an sawi bawk. Vodafone chuan an sim card leh Aadhaar thlunzawm hna chu an la kalpui theih loh deuh thu an sawi a, “Thil tihfel loh tlem a la awm a, hmunpui lam inpeih hun kan la nghak lawk a ni,” tiin Vodafone hotute chuan Zalen an hrilh a, thu dawn danin Airtel tih loh company dang chuan thlunzawm hna hi an la kalpui rih lo. Supreme Court chuan Sim Card neitu mumal taka hriat loh avanga pawi nasa tak a thlen theih thu leh sim card hman sual a nih theih thu an tarlang a. Hemi tihtawpna atan hian mumal taka mobile sim card leh Aadhaar thlunzawm turin thupek a chhuah ta a ni.