Aizawl; July ni 9-11,2014 khan Himachal Pradesh khawpui Shimla ah Union against tuborculosis and lung desease huaihawtin '2nd National Workshop on implementation of empower policy in India' neih a ni. He workshop kaihruaitu Dr. Rana Singh chuan kum 30 kalta ah chuan vaihlo in mihring a tihchhiat theih thu chu mipuiin an la pawmlo a, tunah erawh chuan zirchianna atangin nasa takin mihring a tichhe thei tih an pawm tawh tih a sawi a. "Vaihlo hi a nihna tur taka hmana mihring tichhe thei awmchhun anih avang in tihrem a ngai a ni," a ti. Dr. Rana chuan kumtin India sawrkarin vaihlo chhiah atangin vaibelchhe 1917 lalut mahse vaihlo tihchhiat nghawnga sawrkar senso chu kumtin vaibelchhe 14500 a ni tih a sawiin, "Sawrkar hian hlawkna a hmu lo chang ni lovin nasa takin a sengso zawk a ni," a ti a. Meizuk chuan muangchanga nunna a lak avangin miten ruihhlo dang aiin an ngai pawimawh lo zawk nia a hriat thu a sawi. Workshop hmanpuitu Himachal Pradesh Health & Welfare Minister KS Thakur chuan Shimla tiamin an state chhunga khaw 3200 zinga khaw 3000 chu 'smoke free village' ah an puang tawh tih a sawi a, hei hi khualzin te pawhin an zahsak tih a sawi bawk. Health Minister chuan khawmpui a kal palaite hnenah an state ah khawlaia mei zu an awm tawh lo tih sawiin hei hi state dangah pawh chin ve zel a that a rin thu a sawi bawk. HP Health Minister chuan, "Kan state pumah anti tobacco campaign kan huaihawt dawn a, meizial in taksa a tihchhiat dan thlalak te tarchhuah a ni ang," a ti bawk. Health Minister hian a mal a cigratte hralh thin pawh khap thuai anih tur thu leh hei hian a ching thar tur engemaw chen a ven a beisei tih a sawi bawk. Workshop ah hian India ram state hrang hrang 17 leh Bangladesh atangin mithiamte an kalkhawm a, India ramin nasa lehzuala zuk leh hmuam a do dan tur leh hmalak zel dan tur an sawiho a ni. He huna tel mithiamte chuan vaihhlo atanga chhiah lak tihsanin mei zu thar tur nasa takin a tihtlem phah tih sawiin chhiah tihsan zel nise an ti a. Vantlang hmuna meizuk khap chuan zawm a hlawh tawklo nia an hriat thu pawh workshop ah hian sawichhuah a ni bawk.