Red Shield Division huaihawtin nimin zing dar 9 khan Mizoram chhunga sipai bangte intawh khawm runpui, Ex Servicement Rally chu Thuampui Helipad-ah neih a ni. Sipai bâng intawhkhawm runpui hi Maj. Gen., Balraj Mehta SM, GOC chu khuallian a ni a, Lt. Col. ZS Zuala (rtd) MLA , Capt. Hmingdailova Khiangte MLA, ICFAI Vice Chancellor Lt. Col. Mishra, ACSM (rtd), Project Puskpak Brig. Birender Singh  leh 23 Sector AR DIG  Brig MS Kokha ten an hmanpui bawk. Ex Servicemen rally-ah hian Veer Nari, Hmeithai an pasalten indonaa an boralsan mi 9 bakah sipai huaisen lawmman Gallantry Award dawngtu mi 4 leh indona hliam tuar mi 5 te hnenah chawimawina thilpek hlan a ni. Maj. Gen. Balraj Mehta chuan sipai bangte tan an hmathatna tura Army hmalakna hrang hrang bakah pension chungchanga harsatna awm chinfel dan a sawi  a. Mizo tlangval a tam thei ang ber sipaia tang turin a sawm bawk. Ex Servicemen Rally-ah hian sipai bângte tan a thlawna inentirna te, an pension chungchanga buaipuina tur bakah an mamawh an thlenna tur hmunte siam a ni a, rally-ah hian Ex servicemen leh an chhungte mi 500 dawn an ni.&&&&