ZALEN October 22, 2025: Vawiin khan Mizo Hnam Run-ah MNF din cham vawi 64-na pualin inkhawm neih a ni a. He hunah hian MNF President Zoramthanga, Ex-CM chuan thu sawiin, "Israel faten nasa takin tihduhdah an tuar a, hmun hrang hrangah an darh a. Mahse, an ral lo. Pathian in Abrahama hnena thu a thlun an vawng reng a, he thuthlung hi an theihnghilh a hlau em em a ni. Chutiang bawkin MNF ten kan thuthlung, "Pathian leh kan ram tan" tih kan vawn chhung chuan thang leh thar lo la awm zel turte pawhin he hnam hi an champion pui zel ang," a ti. 

"Sipai hnena vawikhat pek tawh chu laklet leh a harsa em em thin a. Kan airport neihchhun hi ZPM chuan cabinet ah an lo pass daih tawh a. Party dang zawng zawng, NGO, zirlai pawlte leh anmahni party ngei pawhin an duh loh a ni a. MNF chuan, a biling a balangin, a tawp thlengin kan theihtawpin kan dodal zel dawn a, chutiang bawkin, FCAA pawh MNF chuan fai hliauvin a thian dawn a ni," a ti. 

Zoramthanga chuan, "MNF chu mifing leh ropui ni biklo ten an din a ni a. Mithiamber leh mifing ber kan ni bik hauh lo. Amaherawhchu, party lian leh ropui tak tak an ral tawh laiin, MNF chu kum 64 lai kan kal tawh a. Jehova thuthlung meichher kan vawn tlat avangin kan kal zel dawn a ni," a ti. 

MNF President chuan, "MNF tana hnawk party dang chu Pathianin min thenfaisak zel thin a. Pathianin min diptu hnim hlingneite min thensak dawnin, kan theihna leh chakna emaw kan tih mai lohnan, MNF hi a tilianin a ti ropui kher ngailova, a hun takah a dinchhuahtir leh mai thin. Heng hi hun kaltaah khan chiang takin a lang a ni." 

"Lal Isuan, "In chhelin, in nun in chhanhim ang," a tih angin, MNF chu kan chhel a, chu chu kan dam khawchhuahna a ni. Pialtlepah leh hnimhlingnei zingah nilovin, leitha hmuna tla tur kan ni a. Ruling party-a inpe pawh sawitur an awm manglo. Chuvangin, party mite chu chhel taka awmin, kan thuthlung i vuan tlat ang u," tiin a fuih bawk. 

Chief Minister Zoramthanga chuan, "Hripui karah ZPM chu Absaloma thli angin a lo thawk a. Inti itawm tak leh mi khawngaiha ngaihsak awm taka intawktarin, mipui thahnem tak rilru an hmin a. Davida pawh a tlanchhe hial a ni. Amaherawhchu, Pathianin pawisak nei lova, inluling taka hmalakna chu a enliam thei lova, indona hmun tak tak Ephraim ngawpuiah Absaloma chuan a nunna a chân ta a nih kha," a ti. 

He hun hi MNF National Council Member K. Vanlalauva ni bawk chuan a kaihruai a, Rev. B. Vanlalduha, Luangmual chuan hunserh a hmang. Hnam martarte sunna hun hman a ni bawk.