Sawrkar laipui chuan tunhnaiah hmarchhak state 5 Assam, Nagaland, Mizoram, Arunachal Pradesh leh Manipur a sipai awmte chu thuneihna sang zawk mi man theihna leh an duh duh dap theihna pek tumin ruahmanna a siam a, mahse he dan hi sawiselna a awm vang nge ni hman hrih loh turin a ti leh a, engtia kalpui zel tur nge tih a hriat loh a, engemaw chuanlam siamin he dan hi kalpui leh thut pawh a ni lovang tih sawi a har hle.
India ram kalphungah chuan dan leh thupek kengkawhtu Police ten mi an man dawn te, mi chenna in an dap dawn leh thil dang dangah te dan zawm tur a awm vek a, dan an zawm loh chuan court ah khinleta thiam-loh chantir an nih chuan hrem theih a ni. Tuna sawrkar laipuiin sipaite thuneihna sang pek a tum hi eng ang takin hi kalpui anih dawn hriat ni chiah lo mah se, sawrkar laipui thlina atang chuan dan tha tak nia a lan laiin hmansual theih a nihna lai tak hi a huatthlala lai tak chu a ni a. Sipai an inlulin thin avangin state mipui ten an tuar a, an duhlo hle.
Sipaite thuneihna sang pek tum anih avang hian hmarchhak state a zirlai inzawmkhawm North East Students Organisation NESO chuan an duhloh zia an lantir a. Mizo Zirlai Pawl MZP pawhin nimin khan emergency meeting neiin theihtawp chhuaha dodal nise an ti bawk. Sipaite thuneihna sang zawk pekna Armed Forces (Special Powers) Acts hi Mizoramin zalenna a sual laiin Mizoramah pawh hman a lo ni tawh a, India sipaiten nasa takin Mizo mipui kutthlakin an duh duh an man a, in sawisak te, hmeichhe puangsual leh innghaisakna chi hrang hrang a thleng tawh thin anih kha.
Sawrkar laipui thlirna atang chuan hel tamna ram leh international ramri a awm kan nih avangin hmalak chak zawkna atan sipaite thuneihna sang pek hi thil tih awm tak a nihna chen pawh a awm thei awm e. Mahse a tha lo lai chu hmansual theih a nihna lai tak hi a ni. Tunah chuan mihring pawh kan changkangin dan leh hrai pawh kan hre ve ta hle a, tuna sawrkar laipuiin sipaite thuneihna sang pek a tum pawh hi a takin ti hlawhtling mahse tunhmaa insawisak ang chi te kha chu a thleng tawh kher awm love. Mahse tunhma lama lo kalpui tawhna ah sipai te an inlulin thin em avang leh mipui dikna leh chanvo rahbeh anih thin avangin rilru in hlauh a nei lo thei lo a ni.
Central a rorel mek BJP kaihhruai sawrkar hian hmarchhak mipuite hi min hmangaih lovin min ngaihsak lo hle em ni tih mai a awl rum rum ta mai. Citizenship Amendment Bill 6 te pawh nasa takin kan duhlo tih kan lantir chungin Parliament a tihtlang 'pass' tumin nasa takin hma a la zui tho a. Tun tumah pawh hian sipai thuneihna sang pek hi tun dinhmunah sut hrih mahse an tharthawh leh lovang tih sawi theih a ni lo. Mizoram ang state ralmuang, India rama state ralmuang ber leh entawn tlak tih hiala sawiah sipai thuneihna sang pek tumna a awm hi a thinrimthlak a, duhlohna kan lantir hi thiltih awm tak pawh a ni e. Mizo mipuiten kan duhlohzia kan lantir a, kan tanrual tlat chuan sawrkar laipui pawh hian min bengkhawn ngei ang.