South Korean boy band BTS member zinga mi Jin chu an ram danin a phut angin sipaiah a tang ve mek. Sipai a zawm hnu lawk hian social media lamah a lu meh thar 'military haircut' chu a pholang a, "Ka beisei aiin ka inhmeh daih" tiin caption a siam nghe nghe. 

Jin hi BTS member zinga kum lama upa ber a ni a, December 4, 1992 khan a pianga kum 30 mi a ni mek. South Korea ramah hian mipa tawh phawt chu sipaiah tan vek a ngai a, ram dangah pawh awm se an sipai tan hun a thlen chuan an haw vang vang thin. 

Mipa kum 18 leh 35 inkar te chu thla 18-21 inkar tal sipaiah hian an tan a ngai a, chu chu an ram khua leh tui tawh phawt chuan an zawm ngei tur a ni. Chutih rual chuan infiamna, rimawi leh kawng danga mi hlawhtling bikte chu ngaihhna thiamna pek thin an ni a, an pek dan erawh a inang vek lo. 

South Korea hi an thenawm ram North Korea nen an inep reng a, hei vang hian an ram mipa te chu indona a chhuah pawha che chhuak nghal thei turin an training vek a ni. Jin pawh hi North Korean border-ah kar 5 chhung a training dawn nia tarlan a ni.