Aizawl August 29, 2024 : Vawiin khan Centre for Environment and Social Justice (CESJ) Mizoram chuan Aizawl chhuahlam SIPMIU pipe an tih mai, ek paihna pipe lian hun engemaw chen chhe tawh chu siam that hna arang thei ang bera thawk tûrin leh hmalakna nei vat turin Mizoram Pollution Control Board (MPCB) ah ngenna an thlen.

Mirawng lui tih mai thin Chite veng chinah hian he ek paihna pipe hi a khawh thla a. Hetianga ek paihna pipe luia khawh luh tîr ringawt hi mihringte tan leh lui leh a chhûng a cheng nungchate tan pawh thil tha lo zawk thlen thei tu a nih bakah mihring hriselna nghawng thei thil a nih avangin hmalakna nei vat turin CESJ chuan MPCB ah hian a thlen a ni.

Hetianga Environment leh lui te tan a pawi thei leh a nghawng Mihringte tana harsatna nasa zawk thlen thei thil a awmin, veng chhûng VC ten thuneihna huam chhûngah hmalakna chang hre thar tûrin leh an thuneihna piahlam thil a nih chuan hotu sang zawk te hnênah thlen vat zêl tûrin CESJ chuan VC te an ngen bawk a ni.