Aizawl: Nimin khan Skill Development Council aiawh, Mizoram Youth Commission leh CYMA aiawhte chu Hotel Regency ah an inkawm a, Skill Development Council official te chuan Mizoram ah Training Centres 2 din rem tiin CYMA leh MYC te chu Vocational Training Providers (VTP) an nih theih dan kawh hmuh in hmalak pui an tiam. An inkawmna ah hian MYC leh CYMA te chuan an hmalak tawhna te leh an thlen chin bakah an harsatna tawh te an sawi chhuak a. Training chhuak tam tak te chuan Hindi an thiam loh avanga harsatna an tawh thu sawiin Soft Skills Training telna Skill Training a pawimawh ber tur thu an sawi a. SDC aiawhte chuan Skill Training Sector hrang 37 te kawh hmuh in Mizo thalai te tana tha ber tur thlang chhuak turin thurawn an pe a ni. CYMA hruaitute chuan Mizo thalai tam zawk te chu mahni in leh lo ngaih vanga hnathawhna hmun atanga Mizoram pan leh mai thin an nih avangin state chhunga eizawnna atana hman theih thiamna ziritr ni se an duh thu a sawi a. Mizo thalai ten Soft skill training an mamawh thu an tarlang a ni. SDC official te chuan an certificate pek hniam ber chu level 4 a ni tiin level 4 trained te hian India ram chhung khawilai ah pawh hna an hmu thei a, an hlawh pawh certificate nei lo aiin 75% a sang zawka chhawr an ni ang an ti. SDC official Maj. Gen. Kuldip Singh, Security Sector, Brig. P.K.Sanyal, Regional Head(East) leh Col. U.S. Rathore, Principal, S&QA te hian Zirtawp tlai khan Larsap an hmu a, Mizo thalai te tana training neih dan tur an sawiho bawk.