Aizawl: Tourism Minister John Rotluangliana chuan Zirtawpni khan KV Multipurpose School, Durtlang bula ‘Ropeway’ Cable Car landing station hmun tur leh Sihphir leh Lungdai inkar ram Sakawrhmuituai tlang-a ‘Skywalk’ siamna tur hmunte a tlawh. Minister chuan, “Ram chhung leh pawn khualzinte hipna tura Tourism Department hmalaknate hi sorkar laipuiin a phurpui hle a, a siamna tur sum cheng vaibelchhe 99 sanction a ni a, 1st leh 2nd installment pawh dawn fel tawh a ni,” a ti. Mizoramah fur a rei thin avangin hnathawh theih hun chhung a rei lo va, a siamtu tur Leading Edge hotute lo kal hnenah a rang thei ang bera hna tan turin a hrilh nghal. Ram chhung leh rampawna mite Mizoram lo zin thin mah se kalna tur an hriat vak ngai loh thu sawiin Minister chuan Durtlang-Tourist Lodge, Chaltlang inkarah thlunzawm tur Ropeway chu Asia-a sei ber tur a ni dawn a, Sakawrhmuituai tlang-a Skywalk tur phei chu India rama hmasa ber a nih dawn avangin tourist tam tak a hip thei dawn a ni, a ti bawk. Tourism Director Biakthanmawia Pautu chuan Skywalk hmunah hian mountain biking, nature walk, dawr chi hrang hrangte pawh siam niinlirthei park-na tur pawh felfai taka ruahman tum a ni tih a sawi a. Skywalk hi India ramah pawh a hmasa ber tur a nih avangin Mizote ngei pawhin an hlutin an tlawh chak ber hmun a nih thuai a beisei thu a sawi.