Aizawl; AH &Vety Department in Mualpui-a sa talhna 'Rural Slaughter House' an siamah chuan thla tin Bawng 500 vel an talh ziah a, Zirtawp zanah phei chuan bawng 80 te an talh thin. Bawng talhna hmun hi Zirtawp zan khan AH & Vety Minister C.Ngunlianchunga chuan a tlawh a, Department hmalakna te a enfiah. Vety Department thawktute chuan Slaughter House hi Chaltlang, Bawng-kawn, Zemabawk leh Vaivakawn bazar tih loh bazar dang a mite chuan an hmang vek niin an sawi a. Bawng talh turte hi a thianghlim leh thianghlim loh, mipui ei atan a him em tih Doctor ten an enfiah hnuah chauh certificate siamin phurhchhuah an phal thin tih an sawi a, a hrisello te chu an paih tir thin tih an sawi bawk. AH & Vety department thawktute chuan tunlaia bawng an talh thin chu Burma lam atanga lokal ni lovin Silchar lam atanga lak a ni tih an sawi a. Burma lam bawng chu a market a that avangin China lamah an hralh tawh zawk niin an sawi. Bawng kahhlumna khawl an hman loh chhan chu a buaipui chhung a rei avangin bawng talhtu ten harsatna an tawk a, anmahnin talh mai an duh avangin an hmang lo tih Vety thawktute chuan an sawi a, hmang duh an awm chuan hman theih reng ani tih an sawi bawk. Slaughter House hi April ni 8, 2013 khan Chief Minister Lal Thanhawla chuan a hawng a, sa talhna hmun hman manah hian a talhtute chuan bawng 1 zelah Rs.40 an chawi bakah certificate manah Rs.10 zel an chawi ve thin a ni. Zirtawp zanah chuan dar 7:30 vel atanga talh tanin a tuk Inrinni zing dar 7 thleng ten an talh thin a ni.