Aizawl: Sawrkar laipuiin Smart City tur a thlanna kal zelah Aizawl chuan phase I paltlangin phase II a lut a, stage V thleng a kalpui theih chuan kum 5 chhungin Aizawl cheinan vbc.500 a hmu thei dawn a ni. Smart City Mission chungchang inrawnkhawmna tunhnaia neih ah UD&PA Department hotute chuan Aizawl khawpui chu phase II a hlangkai turin hmalak mek a ni tih an sawi a, stage II hi a paltlang chuan Smart City Mission hi a tak taka kalpui tan theih chauh a ni ang. Smart City hian tha zawka hmasawnna hna thawh leh mipuite nunphung tih changkan chu a tum ber a ni a, hmasawnna hna thawh turah hian cheithat (redevelopment & retrofitting), hmun hring siam (greenfield), faina ngaih pawimawh leh tunlai thiamna hmanga awlsamna siam (pan city) te chu a tum ber a ni. Thudawn danin Smart City Mission hnuaiah hian Zodin cinema hall hlui chu parking atan siam, Sihhmui-University kawng siam, Aizawl khaw daifemaMaxicab dinna siam leh tui, electric, leiman etc te hmun khat (internet) hmanga pek theih tura siam te chu ngaih pawimawh tum a ni. Smart City sawihona ah hian mithiam kalkhawmte chuan kum 2012 a Aizawl Master Plan lo siam tawh zul zuia hmalak, tui paihna tha/mumal zawk siam, kawng chhawng siam, ram mawina (natural heritage) tichhe lo zawnga hmalak, khawpui chhunga ranvulh tih-tawp, online hmanga bill pek theihna siam, kea kalna kawng tam zawk siam, kawng sira motor dah loh, electric hrui etc. hnawk thenfai te chu an ngaih pawimawh zingah a tel. Smart City tur hian India ram khawpui 100 thlanchhuah a niin an zinga 2 paih an nih leh tak avangin khawpui 98 te chu an inel dawn a. Aizawl khawpui tan bik stage II atan inbuatsaih nan nuai 198 chu sawrkar laipuiin a rawn pechhuak (release) tawh a ni. Smart City Mission sum hi Central leh State in 50:50 hmanga intumsem tur a ni a,Mizoram sawrkar chuan 90:10-a intumsem turin Central a nawr mek a ni.