- C.Dorema Khasi Veng, Kulikawn India rama khawpui 98 chu tunah hian state capital 24 telin Smart City tura buatsaih leh thlan a niin chumi zingah chuan Aizawl khawpui pawh telh a lo ni ta a, hei hi thil lawmawm tak a niin a phurawm hle mai. Smart City ni tur hian a sawifiahna leh a tehna tur ruahman fel tak chu awm lo mah sela, hetiang ni tur hian thil pawimawh hrang hrang zingah infrastructure pawimawh zual : tui thianghlim in tur te,electric supply te,sanitation lam te, bawlhhlawh senghawi dan tha leh fel te, tin, khaihlak lova mipui chet vel zung zung theihna tur transport service te, mi chengte him tak leh harsatna nei lova an awm theihna tur te leh electronics lam hmasawnna hmang tangkaia inpawhna hrang hrang neih leh khawvel ram zau zawkte nena information technology hmanga inpawhna leh inzawmna tha neihte a huap vek mai. Tin, mipui hnena sawrkar hmalakna hrang hrang chungchang puanzar leh hriattirna tha zawk neih te, mipui lamin sawrkara thu an thlen duh thlen theihna tura kawng awlsam leh zau zawka buatsaih te, electric hman tur khaihlak lo neih te, tui in tur a thianghlim tawk leh englaipawha endik thin te, bawlhhlawh zawng zawng thehthang dan fel taka thehthang vek thin te, a tangkai thei ang bera nizung leh thli chakna hman tangkai te, lirthei chi hrang hrangte chatlak lo leh fel taka kal theih dan tur ruahman leh parking remchang tha leh fel buatsaih te, kea kalna tur bik buatsaih te leh hmun awl remchang lai apiangah a vel tinuam leh tihahdam tura thing, pangpar leh phaitualhnim hmun buatsaih thlengin he smart city hmalakna hian a tinzawn leh a tum ber berte a ni dawn a ni. Chutiang kawnga cheibawl turin Aizawl khawpui pawm a lo ni ve ta hi a lawmawm hle mai. Heta sum hman tur tamtak hi chu sawrkar laipui hian a ruahman dawn chu a ni ngei ang. Nimahsela, tun dinhmunah chuan kan kawngpui neih zawng zawngte hi lirthei chi hrang hrangin a khat tlat a ni ber a; kan hmun neih lah hi a rem emaw rem lo emaw hmun awl a nih phawt chuan in saa hnawh khah zel kan tum  emaw tih tur a ni mai bawk si a. A ngaihtuahtu Urban Development & Poverty Alevation (UD&PA) Department-te tan chuan a buaithlakin a luhaithlak ve hle mai thei. He ‘Smart Cities Mission’ hi sawrkar laipui duh dan ringawta kalpui pawh  ni lovin, khawpui liana cheng mipui aiawh (ULB) lam rawtna pawh la telin khawpui 100 tana Smart City buatsaihna tur hi Prime Minister, Narendra Modi-a’n June 25, 2015 khan a puang rup mai si a; heta sum sen tur pawh Union Cabinet-in  Central leh State sawrkar sum thawh tur pawh bithliah siamin kum 2017 atanga 2022 chhunga hman theih tura tih a ni awm e. Tin, heng hnathawh tur hian state-in public sector company siamin CEO nghet neia thawh tur a ni ang a; chu chu PPP Mode an tih ang hian Sawrkar, Company leh Mipui aiawhten an enkawl dawn a ni. Tin, kum 2022 atangin heng khawpui thlan chhuahte hian Smart City angin hma an la ang a, chung chu endik a ni ang a, a ti thate chu kum 5 chhung lawman siamsak an ni dawn a ni. Chutih rual erawh chuan kan hmunte a chepin harsatna tam tak karah pawh kan khawpui neih chhun Aizawl tihhmasawnna tur hi chuan a chhunga cheng hlunte hi chu kan inhuam thui hlein a rinawm. A dik tak phei chuan kan tu leh fate leh kan thlah lo la awm zel turte tana chenna leh chet velna hmun nuam leh muang,boruak thianghlim leh hmun hrisel a lo nih theih hi chu kan duhsak ngawih ngawih a ni bawk si a; chuvangin, mipui lam pawh rilru kan buatsaih a pawimawh hle dawn. Khawpui mawi, nuam, fai leh thianghlim, thengthaw leh sik leh sa nuamah hi a chengte leh tlawhtu (Tourist)-te’n nuam kan tih theihna’n te leh kan dam a sei nante Aizawl khawpui hi i buatsaih ang ule!!! Kan ram, kan khawpui, kan seilenna a ni a, hei lo hi kan khawpui tia sawi tur pawh kan neih loh hi! Mahni zawn theuhah ngun takin ngaihtuah theih ila, mahni vei zawngte pawh sawiin a ruahmantute fin chhuah turin thurawn i pe thin ang u.