Aizawl: Zirtawpni khan State Level High Powered Committee for Smart Cities Mission in Mizoram (HPSC) chu an chairman Lalmalsawma, Chief Secretary hovin an thu khawm a, Central in smart city atana tehfung a siam atanga tling awm chhun, Aizawl khawpui chu Smart City project kalpuina hmun atan an rawt. HPSC meeting Zirtawpni a neih ah chuan Smart City Project thawhna tura Central in a chanve ve ve a sum senso intum sem tur a tih lai chu zirchian phawt tha a ti a. Central Sawrkar in ruahmanna a siam dan chuan Smart City project hi Centrally Sponsored Scheme (CSS) hnuai ah central-state 50:50 Funding hmanga thawh niin a tum ber chu khawpui felfai buatsaih a ni a, he khawpui ah hian tui leh electric supply hnianghnar taka sem, bawlhlawh leh hnawmhnawk awmze neia chinfel, mirethei te chenna tur buatsaih sak, Information technology hman tangkai, khawpui chhung leh boruak vawn thianghlim, zirna hmun leh damdawiin tha din bakah thil tangkai tak tak ruahmanna te a tel a ni. Mizoram chhunga Smart City Mission Director atan hian Secretary, UD&PA chu ruat a ni a. Mizoram in he project hi a kalpui thei a nih chuan Central puihna he Mission atan hian kum 5 chhung kumtin Rs. 100 Crore ang hu a dawng ziah dawn a chhut a ni. Smart Cities Mission khuh hawnna hi June 25, 2015 khan New Delhi ah neih a ni a, he hunah hian UD&PA Minister Zodintluanga leh Chief Secretary Lalmalsawma te bakah UD&PA Department hotulu te pawh an tel a ni. %%%%%%%%%%%%