Aizawl: Aizawl khawpuiin smart city sum a dawn theihna tur ruahmanna chu tunlai hian UD&PA Department chuan an buaipui mek a, March 27, 2017-ah thehluh an tum. Zalen palaiin a biaknaah UD&PA Secretary Dr. C.Vanlalramsanga chuan tunlai hian proposal an buaipui mek niin a sawi a. “Ministry lamin consultant ruai tura min tih angin kan ruai mek a. Kan proposal hi mipui en theih turin March ni 15,2017 hian tar kan tum a, March 27, 2017-ah thehluh kan tum ang,” a ti. Sawrkar laipui, Ministry of Urban Development department chuan India ram khawpui chei bik tur ‘Smart City’ tan khawpui 100 a ruahman a, heng zingah hian khawpui 3 chu hnawl an nih hnuah khawpui 97 te chu an inel leh a. Heng zingah hian Aizawl pawh telin Aizawl hmasawnna atana an ruahman te thehlut mahse mark 1 ten an tlinloh avangin phase I leh II ah thlan an ni lova, Ministry lam chuan proposal hi March ni 31,2017 hmaa thehlut turin an ti leh ta hrih  a ni. Smart City atan hian khawpui 60 chu thlanfel a ni tawh a, tunah hian khawpui 37 chu thlanleh hmabakin an la awm mek a ni. Smart City a thlan te hian khawpui cheina atan vaibelchhe 500 an dawng dawn a, a tirah vaibelchhe 200 pek an ni ang a, a bak chu an hnathawh dan zirin sum hi pekchhuah leh tur a ni.