Chris Norman leh a hote chuan Manipur-a concert an neih tur chu an tihlawhtling thei dawn rih lo a, a hun leh ni tur a la chiang thei lo. Smokie member zinga mi pahnihte chuan India visa an tifel thei rih lo a, hei vang hian December 1-a Manipur khawpui Imphal-a show an neih tur chu an postpone a ngai ta a ni. Chris Norman concert neih turah hian Mizo nula Rosy K. Remsangpuii chu opening act nei tura sawm a ni nghe nghe bawk. 

Chris Norman leh a band Smokie te hi 7 Sisters Foundation chuan Manipuir-a concert nei tur hian chah luh an tum a, December 1-a show nei tur an ni. Mahse chawpchilh takin a hun sawn a ngaihthu puan a ni a, a hun leh ni tur tihchian theih a ni rih lo. Hemi chungchangah hian 7 Sisters Foundation director Sunny chuan a rang thei ang bera chinfel an tum tur thu a sawi a ni. 

Hetih lai hian Aizawl-a concert rawn nei zo hlim MLTR te chuan Manipur-ah hian November 9, Thawhlehni zan khan concert hi an nei thung. Chris Norman ticket lei tawhte chu Michael Learns to Rock show ticket nen inthleng phalsak an ni nghe nghe a, a remchan dan angin ruahmanna an siam sak a ni. Manipur-ah chuan Michael Learns to Rock (MLTR) concert ticket hi - Rs. 2000, Rs. 3000 leh VIP Access Rs 10,000 man ten an siam a ni.