Australia chuan, a zawna kum nga World Cup final an khelhna turin nizan khan penalty hmangin Peru an hneh. Qatar kal tur zawnna Intercontinental qualifying play-off-ah hian hun pangaiah Australia leh Peru hi goal awm lovin an inhnehtawk a, penalty petin goalkeeper Andrew Redmayne chetthat zarah an tlang. 

Australia leh Peru hian hun pangaiah goal an thun lo ve ve a, penalty an chhuih a Australia hi 5-4 in an vannei ta zawk a ni. World Cup an khelh theihna tura an hero chu goalkeeper Andrew Redmayne niin Alex Valera a penalty pet a lo dan sak a, amah vangin kum tawpah Qatar an pan ve thei dawn ta. Al Rayyan stadium-a inkhelhah hian a tirin Redmayne hi a lut nghal lo nghe nghe a, goal awm lova an inhnehtawk hnu minute 120-naah substitute atangin a rawn lut ve chauh a ni. 

Penalty-ah hian Australia lamin an pet hmasaa, Martin Boyle rawn pen chhuak hmasa berin vanduaithlak takin a penalty pet chu Peru keeper-i'n a lo dan sak. Peru lam atangin penalty petu zinga a pathumna Luis Advincula chuan post pet perin a chhuih lut lo bawk. An ni pahnih lo chuan an chhuih lut vek a, a tawp berah Peru lam atangin Valera a rawn pen chhuak ve leh a, Socceroos chakna turin an keeper Redmayne chuan a lo dan sak ta hlauh a ni.

Inkhelh inhnehtawk takah hian team pahnih te hian goal thunna chance tha an nei ve ve chungin an hmang tangkai thei lo. Australia lam hian hun tawp dawn hnaiah tum hnih ngawt goal an thun teuh hle nghe nghe. Peru lam pawhin extra time hun tawp dawn lamah Christian Cueva hmangin goal an thun teuh hle a, Edison Flore-a goal post head per pawh kha an pawitih tizual tu mai a chang ngei ang. 

Australia hi Group D-ah an awm dawn a, lo awm tawh sa defending champion France, Denmark leh Tunisia te nen an awm ho ang. World Cup khel tur hmun ruak pakhat la awm chu zanin hian tih chian a ni dawn a, New Zealand leh Costa Rica ten Al Rayyan stadium-ah bawk Qatar kal tur an tichiang dawn a ni.

Line-ups
Australia XI: A. Behich, M.Leckie, Mooy, M. Boyle, Ryan, B.Wright, M. Duke, J. Irvine, A. Hrustic, K. Rowles, N. Atkinson
Subs: D. Vuković, A. Redmayne, T. Sainsbury, Degenek, Craig Goodwin, A. Mabil, J. MacLaren, N. D'Agostino, F. Karačić, R. McGree, D. Genreau, M. Tilio

Peru XI: P. Gallese, C. Zambrano, C. Cueva, L. Advíncula, A.Carrillo, A. Callens, Lapadula, M. Trauco, R. Tapia, C. Gonzáles, S. Peña
Subs: A. Corzo, J. Carvallo, H. Calcaterra, M. Araujo, P. Aquino, É. Flores, W. Cartagena, Á. Campos, L. Abram, M. López, S. Ormeño, A. Valera