Aizawl: Rural Development Minister Lalruatkima chuan, "Social Audit tha taka neih hi sawrkar tha neihna kawng pawimawh tak a ni," a ti.            

Zirtawpni kaltaa National Institute of Rural Development & Panchayati Raj, Hyderabad leh State Institute of Rural Development & Panchayati Raj, Mizoram tangkawp buatsaih 30 Days Training Course For Social Audit Resource Persons a hmanpuina ah he thu hi sawiin Rural Development Minister Lalruatkima chuan, "Mizo ten Social Audit kan hmelhriat tanna chu kan rama ni za inhlawhna kan tih mai, Mahatma Gandhi National Rural Employment Guarantee Act, 2005, kum 2006 tawpa a lo chhuah tan khan a ni a. People's Participation, Transparency leh Accountability te hi sawrkar tha dinna kawnga thil pawimawh pathum te an ni a, Social Audit tha taka neih hi sawrkar tha neihna kawng pawimawh tak a ni," a ti a. Minister chuan Social Audit chuan a dawngtute hnenah public sector programmes te chu thuneihna a pe a, ruahmanna siam kawngah te, a tihhlawhtlin kawngah te, a hnathawh kawngah leh a en dik kawngah tha takin hna a thawk niin a sawi bawk. 

Social Audit concept hi kum 1940 bawr vel, depression era lai khan USA ah an lo hmang tangkai tawh a, sawrkar leh Private sector company ten mipui hnena an thil sem chu a thlenna hmunah a thleng ngei em tih enfiah nan an lo hmang tangkai tawh a. 1950 bawr khan Europe a Company/Corporate te chuan an hnathawkho leh anmahni dawrtute lungawi leh lungawi loh enfiah nan an hmang thin niin an sawi. Guatemala (1985), Mexico (1991), Nepal (2000) leh Uganda (2000)-ah te hian ram dang atangin tanpuina an pekte hman dik a nih leh nih loh sawrkar nena tang dunin Social Audit hi an lo kalpui tawh bawk a ni.