ZALEN September 27, 2025 : Aizawl City College Joint Students Union (ACCJSU) chuan Social Infrastructure and Services fund dawng thei tur zinga a tira College zirna emaw, Higher & Technical Education Department te telh an nih laia tun hnaia Notification chhuakah he fund dawng tur zingah tel an ni ta lo chu an rilru a na a, an dawn theih nan a tawp thlengin hmalak an tum.

Mizoram sawrkar in Notification August 30, 2024-a Mizoram Value Added Tax (Amendment) Rules, 2024 a tihchhuah ah khan, Diesel leh Petrol Litre 1- zelah Road Maintenance-na atan Rs. 2.00 leh Social Infrastructure and Services atan Rs. 2.00 bawk CESS (Chhiah) lak a ni.

Road Infrastructure Cess hi Road Fund Act, 2007 nena kal kawpa lak niin kawng siamthatna atana hman tur a ni a, Mizoram Road Fund Board-ah hlan tur a ni. Social Infrastructure and Services atana Cess khawn khawm te hi he Notification-in a sawi : (i) Human Resources Development Infrastructure, (ii) Development of wellness infrastructure, (iii) Skills Development leh (iv) Women Centric Projects-ah te la sem leh tur a ni a. August 30, 2024-a Notification tihchhuah ‘Human Resources Development Infrastructure’ a tih hnuaiah hian ‘Degree Colleges’ tih pawh a tel a ni. 

Nimahsela, Social Infrastructure and Services hnuaia Department/ Sector te hnena sum pek dan tur semna atan Mizoram Finance Department chuan Council of Ministers meeting resolution angin Notification August 21, 2025 khan an tichhuak a. He an Notification-ah hian sum dawng ve thei zingah College zirna emaw, Higher & Technical Education Department lam a tel ta lo a. ‘Human Resources Development Infrastructure’ tih hi School Education Department-ah chauh an kaltir zo ta vek a, pawi an tiin an rilru a na an ti. 

Minister Dr. Vanlalthlana Press statement (3.9.2.24)-ah pawh khan Zirna In tihchangtlunna atan hman a ni ang a ti a. Tin, Notification dated 30th August, 2024-ah pawh College kan tel bawk. Hetianga Notification 21th August, 2025-in College lam a paih ta hi kan rilru a na a, College lam hi zirna Inah sawrkar in min chhiar tel ve lo em ni? Eng vanga College Education lam hi paih bo a nih tih chu an zawhna a ni? an ti.

ACCJSU chuan, "Degree College/ Higher & Technical Education lam hian chan tur a neih ve ngei theihna turin Mizoram sawrkar thuneitute hmala turin kan ngen a. Press Release kaltlanga kan ngenna hi ngaih pawimawh a hlawh em tih kar khat (Ni-7) chhung kan ngaichang ang a. Ngaih pawimawh a hlawhlo anih chuan a tawp thlengin na takin hma a la dawn a ni," an ti.