Aizawl October 13, 2023 : Social media-a hursualna lam video tunhnai chhovah a darh nasa hle. Mizoram Police Media Cell te chuan heng thlalak leh video tha lo hi mipui nawlpui hmuh leh hriat atan a him lova, hetiang thil titute hi Section 67A, Information Technology Act, 2000 hmanga kum nga lungin tan thlenga hrem theih a ni, an ti.

Video siam leh thehdarh chungchangah hian Cyber Crime Police Station chuan Case No. 60/2023 chu ni 7.9.2023 khan U/S 67A IT Act, 2000 hmanga case siamin an chhui zui nghal a. He video siamtu leh social media-a dah chhuaktu ni ngeia hriat mi pahnih chu man niin, ni 23.9.2023 khan court-ah hruai an ni.

Instagram live-a mipat-hmeichhiatna hmanglai post chungchangah Cyber Crime Police Station Case No.61/2023 U/S 67A of IT Act, 2000 chu ni 13.9.2023 khan ziah luh a ni bawk a. He case chhuizuina atang hian he Instagram account neitu leh live a video post-tu ni bawk chu hriatchhuah a ni a. Ama duhthu ngeia he live video hi siam a ni tih hriatchhuah a niin, damdawi a ruih vanga ti a nih thu a sawi tel bawk a ni. Ni 26.9.2023 khan court hmaah hruai a ni.

Heng case pahnihte hi uluk taka chhui mek a la niin, hnuchhuina atana thil pawimawhte lak khawm mek zel a la ni bawk.

Mizoram Police chuan hursualna lam video leh thlalak duk dak lo chi reng reng social media-a thawn darh lo turin mipuite a chah a. Hetiang ang kaihhnawih video emaw thlalak post darhtute hi Section 67/67A of IT Act, 2000 hnuaiah dan anga hrem theih an ni tih hre reng turin mipuite a hriattir bawk a ni.