Aizawl March 25, 2023 : Lunglei Municipal Council inthlan lo awm tur atan ward hrang hranga fehchhuk MNF Adviser Dr. R. Lalthangliana chuan LMC awm tha lo titu te chu inhnukdawk ngam turin a ti a, social media lama an beihna thenkhat te a chhang let bawk. 

Dr. R. Lalthangliana Health Minister chuan party thenkhatin MNF chu Lunglei lam ngaihthah leh engmah thawk lo anga social media-a vawrh thin chu chhangletin, "MNF sawrkar thar chuan Mizorama integrated laboratory lian ber chu Lunglei-ah an dah tawh, puitling leh naupang ICU la awm ngai lo Civil Hospital Lunglei-ah ICU 28 an hawn fel tawh a, tun hnaiah Mizorama Trauma Facility centre hmasa ber neihna hmun chu Lunglei a ni a, Chief Medical Officer office thar hawn a ni tawh," a ti Lunglei market building chhe tawh mipui tana hlauhawm tawh changkang taka sak that nan cheng vaibelchhe 14.43 zet senna Bazar building sak tur lung an phum tawh tih a tarlang bawk. 

Thangtea chuan, "Lunglei By-pass road atan cheng vaibelchhe tam tak ruahmanna kan siam thar a. NHIDCL hnenah tender pek niin, nimin lawkah MoRTH chuan DPR siam tur tender chhuah a ni. Reiloteah Lunglei-ah Geology & Mining Regional office thar, post 15 keng tel tur hawn thuai tur a ni," a ti bawk.

Assam Rifles-te pawh a order mai ni lo, an bungbel nen Zokhawsang lamah Zoramthanga kaihhruai sawrkar chuan a suan phei ta chu lawmawm a tih thu a sawiin, "Pathianin MNF chu a hruai a, Pathian khawngaihna a zarah state-ah sawrkarna kan siam zawm leh ang a, LMC-a kan thlan tharte nen tha takin kan thawk ho ang. Congress-in tuna MLA 5 an neihna hmun hi Mizoram laili bial lo deuh vek a ni a, heng bialahte hian MNF-in MLA kan neih belh ang. ZPM-in social media-ah thupuar pawleng, a tak tak hmuh tur awm si lo nasa takin an vawrhdarh chiam chiam a, a takah an kawrawng hle a ni. Kumin kum tawp inthlanpuiah hian Pathianin MNF bawk a sawrkar tir leh ngei ngei dawn a, chutiang chu tuna Mizoram kalphung a la ni rih tlat," a ti.

LMC chungchang tul ti lo ho chungchang sawiin Dr. R. Lalthangliana, "Lunglei-ah LMC a awm tul ti lo angin an awm a, municipal nasa takin an sawisel a, flag eng nen an tlan phe ve dawr dawr a, nasa takin an bei ve leh si a. In hnuhdawh hun pel tawh mah se; LMC awm thalo titute hian candidate an inhnuk dawk ngam mai lo em ni tih chu ka zawhna a ni. Keini chuan a hlutna leh thatna kan hria a, LMC sorkar thar siam hmangin Lunglei khawpui hi kan chei dawn a ni," a ti bawk.