Aizawl; Social Media Facebook, Whatsapp etc. hmansual vangin Mizoram ah case 46 ziahluh a ni tawh. Case ziahluh hi kum 2009 leh 2010 ah 2 ve ve, 2011 ah 5, 2012 ah 4, 2013 ah 9 leh 2014 ah 24 te an ni a. Mi tam tak social media inbumna vanga sum chan te, intihhmingchhiat thubuai nei te an awm tawh bawk. SP CID (Crime) Joseph Lalchhuana IPS chuan case ziahluh 46 te hi social media hman dikloh vanga thleng vek a ni tih a sawi a, heng zingah hian sum inlaksak (Nigerian scam), intihhmingchhiat, invau te chu case langsar zingah a tel tih a sawi a. Mi sum laksak (Nigerian scam) chungchangah sum tam tak inlaksak a awm nia a lang chungin case erawh 2/1 chauh a awm thung?niin a sawi a, hei hi a chhan chu mi tam takin hmingchhiat an hlauh vanga FIR an thehluh loh vang niin a sawi. Joseph Lalchhuana chuan Nigerian scam chu rampawn lam thil daih a nih avangin chhuichhuah a har tih a sawi a, CBI leh Interpol lamah pawh thlen thin ni mah se awmzia a awm vak thin lo niin Zalen palaiin a biaknaah a sawi a. Social networking inbiak nelna avangin pawngsual pawh a thleng tawh tih sawiin Computer leh mobile phone te hi thil tangkai leh nunphung ti samkhaitu an nih rualin, hman khawloh erawh chuan lung in tan, pawisa tam tak chawi leh mi te hmelmaa siam theitu an nih avangin fimkhur taka kalpui chu a him ber niin a sawi a ni. Dr. Robert S Halliday chuan social media chu mahni in lum atanga mi dangte nena inkawmna leh ngaihdan sawi chhuahna hmun a nih avangin mi a hneh awl bik tih a sawi a. Hman sual theih tak anih rualin tangkai taka hman theih a ni bawk a. Chuvangin thalai ten a tha zawng leh fimkhur taka an hman a pawimawh hle tih Zalen-in a kawmnaah a sawi bawk.