Hmeichhe zinga Instagram-a follower ngah ber Selena Gomez chuan hun eng emaw ti chhung atan social media a khawih dawn rih lo tih a puang a, "Kum 30 ka ni tawh a, social media khawih turin ka upa lutuk tawh," tiin a sawi! Selena Gomez hian TikTok kaltlangin Ningani khan social media a khawih rih loh tur thu hi a puang a ni.

Kum 30 mi American singer hian a social media account hrang hrangte chu a tawpsan lailawk dawn a, engtia rei nge a rial dawn erawh hriat a ni lo. 'Rare' singer hian internet khawvelah zuitu a ngah hle a, IG bikah phei chuan hmeichhe zinga follower ngah ber a ni hial. 'Queen of Instargam' an tih mai hian follower maktaduai 382 zet a nei a ni. Amah hnaih bertu chu Kylie Jenner a ni a, follower maktaduai 380 zet a nei ve bawk. 

Selena Gomez hian rilru lamah harsatna a nei niin a lang a, January thla mai khan Instagram leh Twitter a khawih rih loh tur thu a lo puang tawh bawk. Tunah chuan social media khawih loh tawp a tum ta rih a ni.