Ningania a MJA General Conference tum 48 hman naah Speaker Lalrinliana Sailo chuan Mainstream media (Chanchinbu leh Cable TV) te hlutna a tlahniam chu pawi a tih thu a sawi rualin mipuiin social media a thu belhchhian dawl lo tam lutuk leh a nazawngin an hriat chin chin thu post an ching thin chu pawi a tih thu a sawi.

Ni e, tunlai khawvela social media hian min run nasa em em a, lehkhabu a ni emaw chanchinbu lam chhiar peih kan tlem chho telh telh a, hei hi a pawi tak zet. Hetihlai hian social media lamah thu belhchhian dawl tawk lo kan hmuh te chu kan hriatna hnar a ni ta zawk a, thenkhat ten mi dang beih nan te hmang bawkin thubuai neih phah pawh kan tam ta khawp mai. Hei hi a pawi tak zet a ni.

Hman tlanlawn tak Facebook leh whatsapp lamah chanchinthar hmuh tur tam tak a awm a, chutihrual chuan thu belhchian dawl tawk lo pawh hmuh tur a awm ve reng bawk a, hei mai bakah political party anga inbeihna a nasa em em bawk a, tu lam tang sawi hi nge dik ber tih pawh hriat hleih theih loh khawpin inbeihna a nasa a, an pu te an insawisel sak chiam chiam a, chutih rualin an pu te chu uchuak takin an fak chiam mai thin bawk a, heng inbeihna hrisel lo lutuk te hi Chanchinbu leh Cable TV lamah chuan hmuh tur a awm ve lo a, anni hi chu a him chin, a dik chin, belh chian dawl an dah mai thin.

Social media-ah hi chuan chanchinthar tha tak te hi awm ve thin mah se, belhchian dawn lo leh him lo hi a tam ta hle a, chuvangin social media hi kan hmang a nih pawhin Chanchinbu leh TV news hmangin chanchinthar dik chin hi hriat tum hram hram a tha.