Tunhnai kum hnih khat lek atangin Mizoram ah Social Media a larin a thang chak hle a, he hmasawnna hian chhungtin a thleng ti ila dawt a ni kher lo ang. Social Media hrang hrang Facebook, Whatsapp leh a dangte hi khawi hmun atang pawhin Mobile phone hmanga khawih theih anih avang leh thuthar ber ber pawh hriat zung zung theih anih vangin nasa taka hmasawnna chhinchhiah tlak tak pakhat chu a ni chiang a ni. Khawpui a ni emaw thingtlang a ni emaw, officer leh hna hnuaihnung thawk, hausa leh hausa lo pawhin sum lakluh nen a inmil leh inmil loh pawh chhut lovin Mobile phone changkang tak tak hmangin thil chi hrang hrang kan inhrilh zung zung mai a, hmasawnna hi a zuanin a zuang te pawh ti ila, dawt a ni kher awm love. Thil engpawh hi a tha zawng leh thalo zawng hian hman theih vek a ni a, thil tangkai leh buaina thlentu a ni ve ve thei. Social Media hi thil tha tihnan nge a chhe tih nan kan hman tih inchhut fo a pawimawh! Internet a website hrang hrang ah te hian information tha tak tak, zirlai leh hmang tangkai duhtu tana chhenfakawm tak awmna engemaw zat a awm rualin zahmawh leh sualna chi hrang hrang ko chhuak thei engemaw zat a awm bawk a ni. Hemi kawngah hian nu leh pate pawhin mawhphurhna an nei tih hria a, an tu leh faten eng website nge an tlawh thin a? Facebook leh whatsapp ah te khawi group ah nge an awm tih leh eng thil te nge an 'post' a, eng te nge an 'Like' thin tih te uluk taka an enpui thin a pawimawh. Nu leh pa tan chuan fate tluka rohlu leh ngaih pawimawh tur engmah a awm chuanglo chungin faten enge an tih a, social media lamah engtin nge hun an hman thin tih enpui fo a tha a, an chanchin hrelo nu leh pa nih te hi nakin lawka inchhirna thlentu a ni chawk tih hriain fimkhur lehzual nan hmang ang u. Hei mai bakah kum lama puitling tawha inngai te pawhin social media hmandan kan thiam tawklo hle mai. Facebook te, Whatsapp te hi thinrim hrikthlak nana hmang ta mai mai te, midang tana pawi tur tarlan nana hmang mai leh engpawh sawi theihna 'forum' emaw ti mai tawk mi thahnem tak an awm niin a lang a. India danpui hian 'duh duh sawi theihna' min pek rualin danpui in zalenna a pek hian tawp chin a nei a, chu chu 'midang tana hnawksaka awm loh leh midang pawisawi nana hman loh' a ni. He dan pela thil ti te chungah chuan danin ro a rel a tul thin. 'Rights' tih chawilar viau a, 'Duty' lam hlamchhiah leh si te hi mimawl awmdan a ni. Thil pawi tak dang awm leh chu mi tam tak hian social media a thu tarlan te hi a dik leh dik loh hre ziktluak lova thu dik anga ngai a, 'Luka ziak' tluka lo pawm ta mai te pawh an awm thin niin a lang. Social media a thu tarlan te hi a diklo emaw a thalo emaw tihna lam ni lovin an thu ziakte kha 'A dik em?' 'Khawi atanga thu la nge a/an nih?' 'Thiamchan tum nan leh midangte hneh thei turin a thena zar chauh tarlan a ni em?' tih te finfiah hmasak hnu ah chauh mipui ten thutlukna siam thin se. Tin, thu post tu kha engang mi nge a nih a, mi rinawm nge dawtsawi ching tak tih thlengin hre thei thin ila chuan buaina tam tak hi pumpelh theih a ni ngei ang. Tunhnai mai ah pawh social media a thu thehdarh vanga thubuai nei mi engemaw zat awmin jail bang hial zut pawh an awm a. Chuvangin social media hman thiam hi mitin ten zir ila. Kan duh duh leh vei zawng nazawng dahluhna leh midangte huat thu leh pawi sawina hmun a ni lo tih hre nawn thar leh ang u.