Aizawl September 4, 2024 : MNF leh MSU te chuan Mizoram State Commission for Women (MSCW) Chairperson Lalchhandami d/o Hranghrima (L) chu dan lova ruat a ni an ti a, Social Welfare Minister Lalrinpuii chuan Lalchhandami hian Birth Certificate an hnena thehluh ang chuan dan kalhna a awm lo niin a sawi.

Vawiina thuthar lakhawmtute a kawmnaah Minister Lalrinpuii chuan MSCW Chairperson Lalchhandami chu a certificate thehluh ang chuan 1960 a piang a ni a, hei hi pawmsak a nih avangin tuna a hna chelh lai hi thawk thei a nih thu a sawi a ni. Member ruat chungchanga Sawrkar order hmasa ah hian MSCW Act emaw MSCW Rules hnuaia appoint an ni lem lova, chuvangin a dan hmanga ban kher tul lova ngaih a ni a. Sawrkar executive order chu executive order veka thlak a ni ta a ni.

MNF Legal Board chuan MSCW hi Mizoram State Commission for Women Act, 2004, Rules 5(1) hnuaiah Chairperson atan kum 65 pel tawh chu ruat theih a nih lo. Lalchhandami hi March ni 8, 2024 khan Chairperson atan ruat a ni a, sawrkar document hrang hrang leh Kohhran Record-ah te kum 68-nâ a hmang mêk tawh tih chiang takin a lang a ni an ti. September 9, 2024, tlai dar 5:00 hma ngeia bang turin an phut.

MSU chuan April 8, 2024 khan Mizo Student Union General Headquarter chuan thuthar lakhawmtute an kawmnaah Social Welfare Tribal Affairs, Women & Child Development Department-in appointment notification a Chairperson atana ruat hi RTI kaltlanga chhanna an neih atanga lan danin sawrkar hna atangin March 31, 2016-a supernuation-a pension tawh a ni, an ti ve bawk.