DOWNLOAD OUR APP

Read latest news on your phone
app-store

Socio Economic Development Programme (SEDP) hi

Sep 04, 2022

Nawmchenna mai maia tlakral pawh awm theih a ni. Chuvangin sawrkarin sum a pek chhan ang ngeia tangkai taka hman leh hlawhtlinpui ngei hi a dawngtu mipuite mawh a ni tih hriatthar a pawimawh hle.

Chief Minister Zoramthanga chuan Zirtawpni Hnam Run inkhawmah kumin sawrkar kum chhhung ngeiin SEDP 1st installment ah Rs. 25,000 leh 2nd installment ah Rs. 25,000, a vaiin Rs. 50,000 sem a nih tur thu leh SEDP chu khawi atanga sum puk emawa sem tur ni lovin Mizoram budget atanga sem a ni tih a sawi a.Chief Minister hian financial year tharah Rs. 50,000 lo dawng tawhte pek belh an ni dawn tih leh a dawng thar tur sing tel an pek belh leh tur thu a sawi bawk a ni.

Tunhma atang tawhin party hrang hrang te hian kuthnathawkte hi an dah pawimawh ber thin a, kan ram mipui tam ber hi kuthnathawka eizawng kan nih vang niin a lang. Sawrkar inrelbawlna kaihhnawih tih loh ah chuan kuthnathawktu te lam hawi hi Mizoram budget kal nasatna ber a ni zel a, nakin zelah pawh anih zel a rinawm. Sawrkar kal tawh ah pawh garden colony, jhum control, MIP, NLUP hmang te in kuthnathawktute tanpui an ni tawh thin a, mahse sum kalral tam ngaihtuah erawh chuan a hlawhtlinna hi a sang lutuk lemlo ni in a lang.

Tun tum MNF sawrkar pawh hian inthlan dawn khan Socio Economic Development Programme (SEDP) chu auhla berah neiin thlan tlin an nih chuan kuthnathawktute hnenah nuai 3 pek an nih tur thu an sawi a, sum hi kuthnathawk ten bul an tanna tur leh hma an lakna atana tih a ni. Sum sem/pek chungchangah hian inhnial theih tak a ni a, mi tam takin bultanna tura sum pek/sem hi tha an tih laiin mi tam takin tha lo an ti a. Sum bawiha hruaitu leh thatchhiatna hnar niin an ngai ve bawk a, a tu lam ve ve pawhin an tanhmun sawhnghehna tur hi an nei ve ve a ni.

Engpawhnise MNF kaihhruai sawrkar hian nuai 3 hmanga kuthnathawk leh eizawnna bultan turte chu puih an intiam a, chuvangin SEDP hnuaiah sum hi an sem mekin an la sem zel dawn niin a lang a. Kan sawisel emaw kan duh lo emaw an policy anih angin pawisa hi an sem zel a rinawm a ni. An intiam anga pawisa hi an sem lo anih chuan an thutiama rinawm lo an ni dawn a, chuvangin an tan chuan sem ngei ngei a ngai a. Tun ministry chhung hian sem lo ni se chuan sawrkar hian a tlakphah hial thei a ni.

Tun dinhmunah chuan SEDP chungchangah sawrkar chuan a tih tur ti mekin sum pawh a dawngtu tur (beneficiary) te account ah a thun chho mek zel a. Hetia Mizoram budget sum tam tak mipui hnenah a kal takah chuan a dawngtu mipuite pawhin kan tih tur kan hriat a pawimawh hle. Pawisa hi kan hman mai mai tur ni lovin eizawnna bultanna tur a ni tih hriat a pawimawh a, a dawngtu zingah pawh kan hmanna a zirin eizawnna atana hmang chhunzawm thei an awm laiin engemaw nawmchenna mai maia tlakral pawh awm theih a ni. Chuvangin sawrkarin sum a pek chhan ang ngeia tangkai taka hman leh hlawhtlinpui ngei hi a dawngtu mipuite mawh a ni tih hriatthar a pawimawh hle.

Share now