ZALEN September 7, 2025 : Power & Electricity Minister F.Rodingliana chuan Mizoram sawrkar office hnuaia solar 2,000 awm zinga 1,000 vel chei that a ni tawh tih a sawi.

Aijal Club-ah mega watt 132 pe chhuak thei tur Tuivai Hydro Electric Project khuahna tur atana detail project report inhlanna neihah he thu hi sawiin power minister chuan, “Chhungkaw 800 chuangin an inah solar energy dahin hei hian hmun dang atanga power pawh ngai lovin anmahniin an intum a. Solar fit-na senso hi sawrkar laipuiin 60% tumin state-in 25% kan tum a, hemi hmang hian power tam tak kan tharchhuak tawh a ni,” a ti. 

Power line siam mek a nih avangin tun lai Aizawl khawpuiah power supply a mumal lo deuh chu pawi a tih thu sawi bawkin, “Team 17-ah insiamin ABC kaih thar mek a ni a, hei vang hian power khaihlak a awm thin a. Mahse, power kan neih that zawkna tur a nih avangin tuar hram hram turin mipuite ka ngen a. Ban thar pawh kan phun mek a, hei hi kan zawh hun chuan kum 2036 thleng khawih ngai tawh lo turah kan ngai a ni,” a ti bawk.

Power minister chuan P&E department chu corporation-a dah turin hmalak mek zel a ni tih a sawi bawk.

Tuivai khuahna tur DPR hi M/s Ernst & Young te siam niin P&E Minister F.Rodingliana hnenah an hlan a. Ruahman dan chuan Tuivai hi Ngopa leh Phuaibuang inkarah khuah tum a ni a. Tuikhuah san zawng hi metre 100 a ni ang a, power a siam chhuah theih zat tur hi a vaiin mega watt 132 niin stage 1&2-a then a ni a. 

Stage 1 hi khawl pahnih, mega watt 10 ve ve pe chhuak thei tur a niin mega watt 20 a pe chhuak thei dawn a. Stage 2 pawh khawl pahnih bawk niin mega watt 56 ve ve pe chhuak thei tur niin Stage 2 hian 112 mw a pe thei dawn a. Project senso atan hian Rs. vbc 2,400 ruahman a ni a, a khuahna tur senso hi DEA atangin dil a ni.

Tuivai hi khuah a nih chuan kum khat chhungin a lo berah power 380 MU a thar chhuak thei dawn a ni.