Manchester United star hlui, Ole Gunnar Solskjaer chuan India ram tlawh a tum a, December 15 atanga ni 17 chhunga kal a tum chu rokhawlhna avangin an sawn hla a. February thlaah a kal zawk dawn.

Solskjaer hi a hmain India ramah a la kal ngai lo a, a kal tur chu phurawm a tih thu a sawi nasa hle.

“India ram ka tlawh tur chu phurawm ka ti hle a, Tilak-a Manchester United tantute thawm ka hriat bakah football atchilhtu an thahnem tih ka hriat hnuah phei chuan ka phur lehzual,” a ti.

“December 15 atanga 17 chhung India rama châm tura ruahmanna kan siam hnuah rokhawlhna avangin a hun hi sawn hlat a ni a, a pawi ka ti hle a. Chutih rualin February, 2024 ah ka kal thei dawn a, he mi hnuah hian min hmu duh apiang tan inhmuhna hun remchang a awm thei dawn a ni,” a ti bawk.

Manchester United tantu leh Ace of Pubs neitupa, Tilak Gaurang Shah chuan Solskjaer hi a chah chhuak dawn a, India ram khawpui pathum - Bengaluru, Mumbai leh Delhi-ah hun an hmang dawn a ni.

Football khawvelah Solskjaer hming hi a langsar em em a, India ramah pawh amah ngaisangtu an thahnem hle.

Manchester United player leh manager hlui hi Red Devils tana goal thun hnem zingah a tel pha a, game 366 khelhah goal 126 zet a thun hman a. 1999 UEFA Champions League final-a Bayern Munich laka hun tawp dawna chakna goal a thun kha United tantute chuan theihnghilh thei tawh lo.