ZALEN November 1, 2023 : Vawiin khan Congress hruaitu hlun, AICC CWC member Sonia Gandhi chuan Mizoram inthlanpui lo awm turah Congress Party-in hnehna a chan ngei theihnan duhsakna a hlan a, a thusawi Video Clip chu Rajya Sabha Dy. Chairman hlui leh Union Minister pawh lo ni tawh Prof. PJ Kurian, Dy. Chairman chuan a tlangzarh.

Sonia Gandhi chuan he a thu sawi-ah hian Mizo mipuite duhsakna a hlan a. June 30, 1986 a Mizoram an rawn tlawh a Mizo mipuite an lo lawm danah lawmthu a sawi thar leh a. Kumina a fapa Rahul Gandhi rawn kal an lo lawm danah Mizo mipuite hnenah lawmthu a sawi bawk. Mizoram-ah BJP thawhpui ve ngai lo tur Congress Party vote vek turin mipui a sawm. Sonia chuan, "India ramah sakhaw zalenna a awm leh ngei theihna atan BJP leh a thawhpui te hi Mizoramah leh India ramah kan Vote loh ngam an ngai a. Mizo mipui Kristian tha tak te tan Congress Party a ding reng dawn a ni," a ti bawk.

He huna thusawitu Prof. PJ Kurian chuan BJP hlauhawm dan sawiin "One Nation, One Culture ; One Nation, One Religion ; One Nation, One Language kalpui an tum nasa hle a. He'ng hi hnam tlem zawk leh a bik takin Kristian tan chuan a pawi em em a. Congress Party chuan kan do tlat dawn a. Mizoram mai ni lo India ram pumah sakhaw zalenna a awm theihna atan theihtawp kan chhuah zel dawn a ni," a ti.

Prof. PJ Kurian chuan, "Sakhaw Zalenna chauh hi Congress Party ngaih pawimawh a ni mai lo a. Kan nunphung (Social Life) kan ngai pawimawh hle a. BJP in Parliament-a MP zawng zawng hnena an sem India Constitution Preamble a Secular leh Socialist an paih hi Mizo Kristian tan a pawi em em a. Hemi avang ringawt pawh hian Mizoram leh India ramah Congress Party a sawrkar a ngai a. Chutiang tur chuan Mizoram mipui te'n Congress Party Vote theuh turin ka sawm che u a ni," a ti bawk.