Aizawl: State Executive Committee chuan Covid-19 inkaihhruaina thar (SOP) a tichhuak a, inkhuah- khirhna engemaw zat thlahdul a ni.

Ministry of Health & Family Welfare, Govt. of India chuan ni 15.02.2022 khan thuchhuah siamin India ramah Covid-19 din-hmun a lo ziaawm zel thu leh inkhuahkhirhna te ti kiam hret hret turin State sawrkar te a hriattir a. Covid-19 dona kawngah hian mihring eizawnna leh mihring nunphung nghawng nasa lo zawnga kalpui turin a hriattir bawk a. Chuvangin, Mizoram chhungah COVID-19 hri darh zel tur venna inkhuah-khirhna awm mek chu inthlahdul hret a ni. 

State Executive Committee in AMC huam chhunga inkaihruaina thar a siamah chuan Class X leh XII board exam turte chu School Education Department thuchhuak angin CAB tha taka zawm chungin school leh hostel hawn phal a ni a. Class I atanga IX leh pawl 11 zirlai te tan sikul leh hostel khar a ni ang a, online-in class lak chhunzawm a ni ang. College leh University te chu online a kal chhunzawm tur a ni. Training Institutes ah a hmuna leng zatva in hawn phal a ni.

Biak In a leng zat chanve (50% seating capacity) aia tam lovin chhun leh zanah Kohhran inkhawm pangngai neih phal a ni a, zing tawngtai inkhawm pawh phal a ni. Kohhran Inkhawmpui chu chhun lamah chauh a hmuna leng zat chanve phal a ni. Inneih inkhawm leh mitthi vuina a hmuna leng zat chanve phal ani a, ei leh in sem phal a ni lo. Inkhawmah zai-khawm, zaiho leh zaipawl hla sakho te khap a ni.

Picnic spot hawn phal a ni a, movie theatre a hmuna leng zat zatve hawn phal a ni a, Public Park, Swiming Pool leh sahuan hawn phal a ni lo a. Sports Practice indoor ah mi 20, outdoor ah 50 aia tam lo phal a ni. Sports inelna, tournament te entu awm lovin phal a ni a, Beauty parlour leh Spa hawn phal a ni. Gym leh lumehna dawr inkaihruaina  siam zawmin hawn phal a ni a. Mipui pumkhawm khap a ni a, National/ State level programme pawi-mawh te chu huaihawt phalsak theih a ni ang.

Trekking, hiking, adventure sports, construction works te phal a ni. Tourist Lodge, Hotel, Home stay leh khualbuk dang te, eichawp dawr, Restaurant, Bazar leh dawr te hawn phal a ni.

Mizoram sorkar office ah Group C leh D staff te 50% attendence a inkalchhawk tur a ni. Kohhran leh sakhaw office te hawn phal a ni a, private company office te a chanve attendence zela inkal chhawkin hawn phal.

AMC area pawn lamah Deputy Commisioner chuan Health & Family Welfare Department-in Covid-19 hrileng laka invenna tur inkaihhruaina Operational Guideline for Containment and Surveillance Plan of Covid-19 a chhuah thin te chu uluk taka kenkawh a nih theih nan hma a la tur a ni. An District chhunga COVID-19 hri len dan dinhmun azirin inkaihhruaina an siam ang a, a tul a nih chuan CrPC 144 hmangin curfew an puang thin ang.