Zothani Khawlhring

Tun hnaiah thil ho te teah Mizoram hruaitu lu ber Chief Minister Office (CMO) atanga mi hniam zawk leh thiltithei ve lote vau leh rikrap ang zawnga lalna leh thuneihna kalpui a, FIR thehluh a awm ta fo mai. Chhimbal zam tir chungchangah te, Chief Minister Pu Zoramthanga hmui thui pin lem thlalakah te, scooty ti nung hlurh hlurhtu milem a CM lu (head) ah te FIR thehluh a ni a; Mizoram Kohhran Hruaitu Committee (MKHC) thuchhuak ang tak thu thehdarh chungchangah MKHC hi FIR thehluttu tur ber a nih laiin CMO lamin an thehlut daih bawk a. Hengte hi thil tul lo leh ho mai maia kan police-te buaina siamsakna leh anmahni thlang tlingtu mipui dikna palzutnaah ngaih loh theih a ni lo.

Supreme Court chuan sorkar sawiseltute laka sorkar inluling thin hi ngaimawhin, October 5, 2020 (Thawhtanni) khan thuchhuah a lo siam tawh a. Sorkar sawiselna zawng zawng hi sawrkar pawi sawina (sedition) leh intihhming chhiatna (defamation) a puh zel tur a ni lo, ‘Mi tuin emaw sorkar sawiselna a siam emaw in sedition or defamation law hmanga vau ve tur a ni lo’ a ti a ni.

Tunhnai (Oct 30,2020) a I & PR kaltlanga Food, Civil Supply & Consumer Affairs Deptt in Press Note (No.6412/2020-2021 ) a tihchhuahah pawh mipui vauna anga ngaih theih tur bold ngata thuziak a awm a: “Hun harsa leh khirh Mizoram in a paltlang lai hian mipui ten Sorkar ruahmanna te leh thupek te tha taka zawm tur leh harsatna siam lo turin kan inngen a. Mipui te tana harsatna thlen zawng leh Sorkar hmalakna te tithuanawp zawnga mimal emaw pawl anga hma la an awm chuan Sorkarin dan hmangin na takin a chhanglet zel ang. Chutih rualin, mipuite harsatna ti zangkhai a sukiang zel turin mipuite tan Sorkar a ding tlat dawn a, Mizoram mipuite tan Sorkar chuan theihtawp a chhuah zel dawn a ni. Chutih rualin, inrenchem thiam tur leh intodelh uar sauh sauh turin kan in ngen bawk e,” tiin.

Hei hi sorkar thuchhuah dan kalhmang tur a ni lo reng reng. Department kaltlangin MNF Ministry hi a in hrosa a ni ber a. Hei hian Department a ti zahawm lo a, tute emaw vau leh an chunga phuba lakna hmanruaah sorkar thahrui hman an tum anga puh theih a ni.

India Danpuiin freedom of speech (thusawi kawnga zalenna) zau tak min pek angin mi tinin kan duh zawng sawichhuah theihna zalenna kan nei vek a, sorkar kalphung leh ram hruaitute sawisel theihna zalenna zau tak kan nei a ni. Mizoram Chief Minister Pu Zoramthanga hian a duh duh a sawi a, a risk kual a, an sorkar hmasaka lar tak Peace Bonus pawh a phuahchawp mai mai a nih thu House zahawm takah meuh pawh a sawi chhuak a. Hetiang taka mipui zah lotu lakah hian thubuai siam tur ni se vawi eng emaw zat talbuai tawh tur a ni. Hetiang a nih laia anmahni sawiseltu, mi chak lo zawkte laka thubuai thehlut a, police chakna hmanga hmeh mih an tum thin hi hriatthiam a har hle a ni.

MNF sorkar hotuten thil ho mai maia ngaih theih thila mipui an khinletna leh rikrap zel ang chi hi Communist ramah leh Dictator lalna ramah lo chuan a awm khat hle. Tun dinhmuna an din theihna tura anmahni vote tlingtu Mizoram mipui hi an zah miah lo a, mipui zalenna thlenga rah beh an pawiti miah lo tihna a ni.

MNF sorkar hian mipuite hnena an inzawrhna Manifesto tihhlawhtlin aia FIR an dah pawimawh zawk thin hi sim se la, Mizoram hmasawnna atana an thutiamte tihlawhtling turin theihtawp chhuah zawk rawh se.