Aizawl: Aizawl Municipal Council (AMC) chuan a din tirh atangin mi 4400 hnenah in sak phalna a pe tawh. Aizawl Municipal Council Vice Chairman C.Lalsawivunga hnena atanga Zalen thudawn danin AMC term kal mekah In sak phalna diltu 4492 awmah 4400 chu phalna pek a ni tawh a, ngaihtuah mek 87 awmin, dilna hnawlsak 4 leh inhnukdawk 1 an awm a, In sak chawl lailawk tura tih 88 awmin chungte chu hapta khatah vawi hnih enfiah thin a ni.C.Lalsawivunga chuan in sak lai mek stop development order pek tur 49 a awm mek thu sawiin, in sak chhunzawm tawh lo tura hrilh 8, thiat tura tih 2 a awm thu a sawi. Zalen zawhna chhangin C.Lalsawivunga chuan, in sak dilnaa an ziah ang ni lova sa leh an drawing anga sa leh si lote chu stay order an pek thu a sawi a, In sak him lo Aizawl Development Authority atanga an chhawm 9 an enfiah mek thu a sawi a. Building him lo zingah sorkar Building 4 leh mimal in 5 a awm niin Zalen a hrilh bawk. AMC Vice Chairman chuan In sak dan chungchanga AMC dan duante chu Local Council term thara thlan tlinte chuan an hriat tawk loh thu sawiin, Local Council te chu an huam chhunga In sak dan dik loh an hriat theih nan zirtirna pek thuai an tum thu Zalen a hrilh.