ZALEN, September 12, 2025: Dampa bial by-election lo awm tura rorel lai, ZPM party-in an dintir tur, Vanlalsailova chuan, “Sorkar chakna hmanga khaw hrang hranga Dampa biala hmasawnna thlen hi ka tum ber a ni,” a ti.

Sailova hian Zirtawpnia an party-in an pisaa political session-ah hun hmangin Mizoram pum a veina piah lamah a pianna leh seilenna bial hnufual lutuk avanga biala hmasawnna thlentu a nih theih ringin politics-ah lutin ZPM a zawm tih a sawi.

Politics-a a luh hma pawhin Dampa bial tan ngaihtuahna leh sum leh pai pawh a sen ve tawh thu sawiin, “Sorkar chakna hmanga khaw hrang hranga hmasawnna thlen hi ka tum ber a ni,” a ti.

Sailova hian an bialtu MLA thi ta, Lalrintluanga Sailo-in a lo beisei, a taka a hmuh tak loh thlentir turin ZPM sorkarah Dampa bialin rorel lai MLA an neih ngei theih nan party sawi lova bial an tan rual a tul tak zet tih a sawi bawk.

MLA thi ta chungchang pawh sawiin, “MNF sorkar liamtaah khan kan beisei ang hmasawnna kan hmu lo hle a. Pu Rintluanga pawh kha assembly house-ah bial tan a au chhuak nasa a; mahse, MNF sorkara minister-te khan an ngaihsak tawk lo kha kan vuipui ve hle a ni,” a ti.

Tun hnaia sawi hlawh tak, Forest Conservation Amendment Act, 2023 chungchangah pawh Sailova chuan, “Lo insawi thaih pawlte pawh kan awm a, eptu party pawh an phusa hle mai. A that leh that loh chu ZPM sorkar chhung hian kan hre mai ang,” a ti.