ZALEN, October 05, 2025: Excise Minister Lalnghinglova (Tetea) Hmar chuan sorkarin an department a duhsakna thungrul tura tha zawka thawh a ngaih thu a sawi.

Tetea hian Inrinni khan Vairengte Excise Check Gate tlawhin tun hnaia an hmasawnna leh sorkarin a thuam chakna hrang hrangte a tar lang a, “Sorkarin min duhsak a, kawng hrang hrangin department min thuam chak a, chumi thungrul tur chuan tha zawka thawh a ngai a ni,” a ti. 

Hmun danga an department awmte aia an langsarh zawkna, Vairengtea thawktute chu fimkhur leh taima lehzual turin a chah bawk.

Excise minister-in a tar lan dan chuan kum 2024 khan district thar pathum - Saitual, Khawzawl leh Hnahthialah excise station hawn a ni a. Post thar 12 siam niin thawktu indaih lohna phuhru turin direct recruitment hmangin mi 16 lak an ni a, mi dang 33 lakna tur a kal mek bawk.

Motor thar 18 (LMV 14 leh two-wheeler pali) lei thar bakah LMV hman mek pathum pek an nih thu a tar lang.

Tetea hian tun hnaiah thawktute thahnemngaihna zarah ruihhlo man a pung tih sawiin Vairengte Check Gate-a thawkte pawh an thawhrimna leh hmasawnna chu lawmawm a tih thu a hrilh.

Minister hi Vairengte OC Inspector Malsawmdawngzela’n a lo dawngsawng a. Vairengte Excise & Narcotics Station-ah hian inspector pakhat, sub inspector, head constable leh wireless operator pahnih theuh leh constable 11 an awm mek.