Aizawl; Mizorama High Security Registration Plate (HSRP) siamtute chuan May ni 6,2014 (Thawhlehni) thleng khan motor number plate 74695 an siam tawh a, sawrkar huntiam chhungin siamzawh hman a ni dawn lo. High Security Registration Plate siamtu te chuan number plate siam hna hi Aizawl leh Lunglei ah ngawrh takin an thawk tih an sawi a, anmahni dawrtu chu an awm reng chungin pawl thenkhatte thuchhuah vangin a hma ang chuan an lun vak tawhlo tih an sawi. HSRP chu lirthei neitute in report atanga ni 2 hnuah an siam zo tih sawiin ruahman dan chuan Mizoram a lirthei nei zawng zawng te chu June 14,2014 hmaa High Security Registration Plate hi vuah vek tur tih a ni a, mahse mi tam takin an ngaihsakloh avangin huntiamah chuan an zo hman dawn lo tih HSRP siamna hmun tlawhtu Zalen palai an hrilh. Mizoram a HSRP siam leh vuah hna thawktute hi German leh India Company tangrual 'Shimnit Utsch India Pvt. Ltd.' te an ni a. Aizawl ah chuan Transport building ah hmun neiin Aizawl, Champhai, Kolasib, Mamit leh Serchhip district a motor number siam hna an thawk a, Lung lei ami hian Lunglei bakah Lawngtlai leh Saiha district a motor number plate siam hna an thawk ve thung a ni. High Security Registration Plate ah hian motor neitu hming, address, chasis number leh engine number te chu laser code hmanga dahin uluk taka record vek a ni a. Khawl hmanga kilh leh lock vek anih avangin motor bo venna atan tangkai hle tura ngaih a ni. HSRP hi April 27,2012 khan khatih laia Transport Minister Pu H.Darzika chuan a hawng a, hemi ni atang hian hna pawh tan nghal a ni. Mizoram ah lirthei 150,000 chuang awm anga ngaih a ni a, sawrkar chuan lirthei zawng zawngah HSRP hi vuah vek turin a ti a ni.