Aizawl: Bairabi Zophaia Assam Police ten zirlaite bungrua an tihchhiatsak rul tura Mizoram sawrkar intiamna a hlawhtlin loh avangin MZP chuan Mizoram chhunga company lian leh Assam mi leh sa, Mizoram a awmte hnenah an thiam dan ang anga vehbur khawn an tum. MZP President L.Ramdinliana Renthlei chuan nimin khan MZP Pisapui ah press mite kawmin March ni 10,2018 (Inrinni)-a Zophai hmuna Assam Police in zirlaite mutbu, pawisa leh thildang an tihchhiat hlutzawng chu Rs. 21,70,300 a ni tih sawiin zangnadawmna pe tura Central leh Assam sawrkar an ngenna tih hlawhtlin a la ni lo chu Mizo hnam hmuhsitna ah an ngai tih a sawi. “Mizoram sawrkar hotuten thilbo leh chhia zawng zawngte hlutna chhutchhuak a, pek a harsat loh tur thu an sawi avangin damlote awmna bill leh motor chhiate chu a ba thlau a siam tir leh in khulh chhuah a ni a. Thlamuang taka kan awm laiin July 19, 2018 khan sawrkar hnen atangin lehkha kan dawng a, Zophai buaina chungchanga thilbo, chhia leh damlote senso zawng zawng min tum sak tura an intiamna chu hlen lovin pawisa a neih loh thuin min lo chhang ta mai hi zirlaite hmuhsitnaah kan ngai a ni,” a ti. MZP President chuan Bairabi Zophai hmuna Zofate Chawlhbuk sak tumna chu an la thulh lo tih sawiin ramri chungchanga Chief Minister kaihhruaina hnuaia Committee sang Core Committee thu leh hla an la ngaichang nia sawiin “Core committee te hmalakna leh an thu in awmzia a nei lo a nih chuan MZP chuan  hma a la chhunzawm leh nghal dawn a ni,” a ti bawk.&&&&