Aizawl;Mizoram sorkar chuan Helicopter hman man Pawn Hans Ltd. hnenah Rs. 4,39,97,918 a pe tawh a, ba Rs. 2,24,76,687 a nei mek. Pawan Hans helicopter hman man hi revenue income paih hnuah central (Ministry of Home Affairs) leh Mizoram sawrkar chuan a senso hi 75:25 percent in an intum sem a. Helicopter hman man hi thla1-ah nuai 49 niin helicopter thlawh tir tur hian a tirah kum 2 atan Pawan Hans leh Mizoram sorkar in inremna (MoU) an ziak a, hei hi kum 2 dang pawhsei a ni mek a ni. “Helicopter hi tum 51 charter (mimal duhnaa thlawh tir) a ni tawh a, heng te hi Mizoram pawnah tum 6 leh Mizoram chhunga tum 45 te an ni a, charter na atang hian Rs. 45,63,250 hmuh a ni tawh bawk a. Khualzin phurhna a nih piah lamah, damlo na zual phurh nan a tangkai a, nunna chhan a nih theih phah,” tiin GAD Aviation Wing chuan Zalen a hrilh. Damlo phurhnan hian tum 34 hman a ni tawh a ni. Charter-na man hi darkar khat ah Rs. 70,000 a ni a, nghah a ngaih chuan nghah man lak thin a ni. Khaw 11 - Lawngtlai, Saiha, Chawngte, Lunglei, Champhai, Khawzawl, Ngopa, Hnahthial, Serchhip, Kolasib leh Mamit ah te thlawh tir mek a ni a. Serchhip, Hnahthial leh Kolasib ah te khualzin an tam lo hle a, Champhai leh Mamit ah erawh khualzin an tam thung niin Aviation thawktute chuan Zalen an hrilh bawk. Aviation Department chuan Thenzawl leh Saitual ah te helipad thar siam tumin hma a la mek a ni. Khawpui danga helipad te pawh Aviation chuan cheithat an tum bawk. Thudawnnain a sawi danin helicopter hi Thuampui ah zan riah tir phal a ni lo a, Lengpui airport ah dah thin niin pilot ten kawngchhia leh engemaw ah harsatna an tawh thin vangin a aia hnaiah dahna tur thlithlai mek a ni. Pawan Hans hi 2012 August ni 20 atangin Mizoram ah service tir tan a ni a, Meghalaya, Tripura, Assam leh Arunachal Pradesh te pawhin an hmang mek a, Manipur pawhin hman ve tumin hma an la mek nia hriat a ni. Copter hi mi 11 chuan theihna ni mahse tuipui zawl (sea level) atanga a san vangin Mizoramah chuan mi 6 chauh an phur thei.