ZALEN, Mar. 19, 2025: Hmeichhe hockey-a India innghahna tling pha, Lalremsiami Hmarzote chuan Mizoram sorkarin hockey a ngaihsak chu a lawmawm a tih thu sawiin, “Sorkarin min phurpui phawt chuan hmasawnna kan hmu ngei ang,” a ti.

Nilaini chawhnu Sports Minister Lalnghinglova (Tetea) Hmar hovin Assembly House-a deputy speaker room-ah Mizoram hockey hmasawn nana hmalak dan tur sawihonaah Siami pawh a tel.

He huna sports minister-in hockey hmasawnna tura sorkar hmalakna leh hmachhawp a sawi chhuahte chu Kolasib nula hian lawmawm a tih thu a sawi a, “Player leh association tan pawh chona a ni,” a ti a. Sorkarin a phurpui avang hian hma pawh an sawn ngei a rin thu a sawi.

Sports Minister Tetea pawhin, “Thenzawlah chauh mumal taka hmeichhe hockey kalpui a ni chungin India team-ah Mizo hming a lang thei reng hi a lawmawm a, talent kan nei tih a chiang hle,” tiin a sawi ve bawk.

Siami hi India tan vawi 164 inlan tawhin goal 41 a vaw lut tawh a, Mizo zinga Asian Games-a medal hlawh chhuak hmasa ber a ni a, 2021 Tokyo Olympics-ah pawh inlanin Mizo hmeichhe inlan phak hmasa ber a ni bawk.

Hockey hmasawnna tur sawihonaah hian a khelhna tur hmun tam zawk neih a pawimawh thu sawi lan a ni a. Hauruang-ah PMJVK kaltlangin artificial hockey turf phah mek a nih thu leh tun sorkarah Hnahthialah turf phah ngei tum a nih thu tar lan a ni.

Kolasib Diakkawn-in hockey khelh nan an khelmual an pek pawh lawmawm tih sawi chhuah a ni a, remchang hmasaah turf phah tura ngaihtuah a nih tur thu tar lan a ni a. Muallungthu leh Kawnpuia hockey turf-te pawh tha taka enkawl a tul thu sawiho a ni.

Sawihonaah hian Deputy Speaker, Kolasib bialtu MLA ni bawk, Lalfamkima, Lunglei West bialtu MLA T. Lalhlimpuia leh South Tuipui bialtu MLA Jeje Lalpekhlua bakah Hockey Mizoram hruaitute an tel.