Uruguay star Luis Suarez chuan World Cup qualifier-a CONMEBOL zone goal thun tam ber record chelh mektu, a teammate hlui Lionel Messi record khumin goal thun tam ber nihna a hauh. Atletico Madrid hitman hian Thawhlehni zan khan si hnih faia Chile an hneh tumin goal mawi tak thunin he record hi a siam a ni.  

Goal 29 neiin Argentina star ai hian goal khat chiahin a sang zawk a, PSG ace hian Ecuador 1-1 an inhnehtawk pui tumin goal a khung lo va, chuti chungin game khat khelh hmabak ala neih avangin a thianpa goal thun tluk tur hian goal a la thun belh thei bawk. Barcelona playmaker thin hi 2022 World Cup hian kum 35 a ni ve tawh dawn a, kum 4 dana neih thin he competition hi a khelh tawp berna tur a ni tawh hmel. Bolivian legend Marcelo Martins chu CONMEBOL zone qualifier a goal thun tam pathumna niin goal 10 chiah a la thun. 

Record a siam zan hi Suarez chuan a tan chuan zan danglam bik a nih thu sawiin,“Zan special, game special, kawr special leh goal special a ni. Theihnghilh mai tawh loh tur ram tana thil tih danglam bik a ni," tiin a lawm thu a puang chhuak. Kum 35 mi Suarez-a tan pawh kumin World Cup hi a hun hnuhnung a ni tawh hmel khawp mai. A ram Uruguay tan hian a thawhhlawk hle a, game 131 khelah goal 66 leh assist 37 nei tawhin an ram player zingah a ni aia record nei tha an awm lo.