Aizawl September 18, 2024 : South Tuipui bialtu Jeje Lalpekhlua'n ZMC bula a bial chhung mi ten thlenna atana an hman tura In a luah, South Tuipui Khualbuk tan Voltas Malsawm House chuan Refrigerator an pe a, bialtu MLA chuan lawmthu a sawi.

Khualbuk hi bial chhung atanga damlo ZMC rawn pan ten an hmang tangkai hle a, South Tuipui bial chhung mipui damlo ten tangkai taka an hman a beisei thu Jeje-a chuan a sawi a, thilpek petu Muantea te chhungkua chungah lawmthu a sawi.

South Tuipui Khualbuk-ah hian Khum pali an dah a, a then chhuat velah an mu bawk. Eirawngbawlna engkim an dah a, mahni in eirawng an inbawl mai zel, bial chhung mipuite tan liau liau a siam a ni a, riah man a awm lo bawk.

ZMC-ah hian damlo awmpuitu pakhat chiah in riahpui theih a nih avangin Aizawl atanga inkan te a hautak thin avanga South Tuipui bial te chuan he khualbuk hi an hmang tangkai hle.