ZALEN June 21, 2026: Kolasib district chhunga hmeichhe naupang pakhat, Spa-a thawk tura hruai a, West Bengal police-ten amah hruaitute nena an man chu hun eng emaw chen enkawl a nih hnuah Ningani khan Kolasib thlenpui a ni a, amah hruaitute hi chu hren an ni.

Kolasib atanga chhuak chanchinbu, Kolasib Aw tarlan danin hmeichhe naupang hi Maharashtra-ah Spa-a thawk tur leh thla khata Rs. 12,000 hlawh turin mi pahnihin an hruai a. Kalkawng kal man leh ei leh in zawng zawng pawh a hruaitute hian an tumsak vek a ni. 

Rel hmangin hmeichhe tleirawl leh a hruaitute hian Maharastra hi an pan a; mahse, West Bengal an thlen hian police-ten nu leh pa tel lo bakah amah enkawltu tura ruat (guardian) ni lo ten an hruai chu ringhlelin an hreng a. Tleirawl hi Nadya District Child Welfare Committee (West Bengal) kutah hlanin a hruaitute erawh an hreng thung. 

Spa-a thawk tur anga hruaitute hi Kolasib district-a hmeichhe pakhat leh Serchhip district-a cheng a thianpa niin February 12, 2026 khan Sairang atangin relin an chhuak a; February 14, 2026 khan West Bengal police-te chuan ringhlelin an man a, a hruaitute hi ‘human trafficking’ thubuai an siamsak nia thudawn a ni.

Tleirawl hi Nadya District Child Welfare Committee chuan an district chhunga ‘Home for Girls’-ah hun eng emaw chen an dah a. Nadya District Child Welfare Committee hian Kolasib District Child Protection Unit chu bepawpin Thawhlehni khan Nadya district-a Child Welfare Officer Puja Nandi kaihhruaiin an dah lailawkna Home for Gilrs-a thawktu pakhat leh police officer pakhat chuan Mizoram an panpui a, Nilaini zan khan Sairang thlengin Kolasib DCPU kutah hlan a ni a, home-ah dah rih a ni.

Picture - Gemini AI