Striker Lalremsiami Hmarzote chuan 100th Anniversary Spanish Hockey Federation - International Tournament khelh mekah a hat-trick hmangin India hmeichhe team chu England lakah 3-0 in hnehna a chanpui a, final an lut.

Kolasib nula, Siami hian minute 13, 17 leh 56-ah England goal-ah vaw lutin an inkhelh hmasakah hnehna chang zo lo mah se chiang takin an khelh nawnnaah hnehna a chanpui.

Terrassa, Spain-a Spanish Hockey Federation-in kum 100 a tlin lawmna puala ram pathumte inelna tournament-ah hian Siami te hi vawi thum khelhah tlawm nei miah lovin final an lut a, Pathianni hian a thlengtu nen final an khel ang.

India hian an khelh hmasak berah England tho hmachhawnin 1-1 in an inhnehtawk a, hemi tum hian kum 23 mi, Siami hi a bul tantu zingah a tel phak a. Spain nen hian 2-2 a inhnehtawk lehin hemi tum erawh hi chuan bul tantu zingah a tel lo thung.

Inrinnia an inkhelh kualna hnuhnung berah erawh bul tantu zingah tel lehin a tir atanga a tawp thlengin lehlam tan a hlauhawm tluan a ni.

India hmeichhe team hi September thlaa tan tur Hangzhou Asian Games-a inlan turin an inbuatsaih pah zel a, hemi atan hian July 16-19 chhung khan Germany-ah zinin Test match vawi thum an khel a. Spain-ah hian an tlang nghal a ni.