Italy khawpui hming chawi club Roma chuan nizan khan Conference League final-ah sikhat faia Feyenoord hnehin an champion. Goal awmchhun hi Nicolo Zaniolo-a'n first-half-a a thun a ni. The Special One inti ngat Mourinho chuan a la special reng tih lan tirin, European league a chawina niin hetiang tithei hi football khawvel-ah coach dang an la awm lo. 

Mourinho hi European competition lian pathuma mahni club enkawl champion pui thei awmchhun a nih bakah European final tum nga zet champion thei manager a ni bawk. Kum 2004 leh 2010-ah Porto leh Inter Minal chu European football inelna sang ber Champions League-ah a champion pui tawh a, nizan khan Europe club te inelna lian zinga a pathumna UEFA Europa Conference League-ah Roma a champion pui leh a, Italian club tana Europe football inelna lian tham an champion vawi khatnaa ni zui. 

Manchester United midfielder hlui Owen Hargreaves chuan coach ropui leh mahni inringtawk tak Mourinho fakin,"Football-a thil pawimawh tak chu chak zawk nih hi a ni a, chu thil chu Mourinho hian a tithei a ni," tiin BT Sport a hrilh. 

Inkhelh tan atangin game a nung nghal a, team hnih te an innawr nghal char char. Goal dan thiam Mourinho pawl te an tawm deuh a, Feyenoord lamin nawr deuh zawkin ball pawh an chang tam zawk a, mah se goal erawh an thun thei lo. Dutch club hian nawr viau mahse chance duhthusam an nei hlei thei lova, chutia an innawr tawn zak zak hnuah Roma chuan chawlh lawk hma deuh minute 32-naah Zaniolo-a'n goal pawimawh leh awmchhun a thun a, goal dang a luh belh lo. 

Mourinho-a naute hian hmahruaiin chawllawk hmang mahse minute 45 chhung khel leh tur an la neih vangin an inthlahdah thiang lo. Feyenoord lam lahin theih tawp chhuahin an rawn nawr let a, second half-ah hian ball hlauhawm tak tak an nei chho a, goal erawh an thun thei lo. 

Roma tan chuan zan chhinchhiah thlak tak niin 2008 Coppa Italia an lak hnua trophy an chawi lehna hmasa ber a nih bakah European trophy an chawina hmasa ber a ni bawk. 

Mourinho hian Porto tan Uefa Cup a hlawhchhuah kum 2003 atang khan kum 19 chhungin trophy 26 a chawi tawh a, a hlawhtlinna langsar zual European trophy a lak te chu: 

Club                Season        Competition
Porto               2002-03        Uefa Cup
Porto               2003-04        Champions League
Inter Milan      2009-10        Champions League
Man United    2016-17        Europa League
Roma              2021-22        Europa Conference Leagu