English girl group lar Spice Girls te chuan kumin hian kum 30 an tling ve ta. Hemi pual hian a lawmna hrang hrang an kalpui dawn a, boruak an rawn nei lian chho leh viau a nih pawhin a mak lo ang. 

Emma Bunton, Victoria Beckham, Geri Halliwell-Horner, Melanie Chisholm leh Melanie Brown te awmna Spice Girls hi kum 1994 khan din a ni a, an lar vet vet thin hle. Kum 1994 - 2000 inkar kha an lar vanglai tak a ni a, thawm pawh an nei lian thin hle. Kum 2000 a liam hnu khan an rem zui vang vang a, 2007-ah an rawn kir leh. Mahse 2008-ah an tiltiak leh a, kum li vel an reh zui leh bawk. Kum 2018-ah an rawn kir leh a, tun thlengin thawm an nei zui ta thung. 

Tour neiin rimawi khawvel an rawn sawinghing ve leh a, kuminah pawh an din champha kum 30-na lawm turin boruak an nei leh tan der tawh. An kum 30-na pual hia Royal Mail chuan stamp an tichhuak nghe nghe a, group/band zinga British stamp-a lang thei parukna an ni. Khawvela pop group hlawhtling ber pawl Spice Girls tan chuan an puala stamp siam a ni hi chawimawina ropui tak a ni a, inchhuana tham a tling. 

Postage stamp hi set 15 tihchhuah a ni a, January 11 atang hian hralh chhuah a ni ang. Stamp-ah hian an zai tawhna zinga ropui leh an ngaihhlut bikte a chuang a, chung zingah chuan - Brit Award (1997), London Olympic Games (2012) leh Spice Girls Tour (Madison Square Garden, New York City - 2008) te pawh a tel nia tarlan a ni.