May ni 9, Thawhtanni zan khan R Dengṭhuama Indoor Stadium, Mualpuiah TNT leh Chhinga Veng Spikers te inkhelin championship bul tan nan TNT hnehna an chang. Set khatnaah TNT hi insiam rem hman chiah lo mah se Vanlaltanchhana (Buanga) leh Laldinchhunga ten team an fuih phur thiam a, set hnihna atanga la tlang vekin 22-25, 25-15, 25-23, 25-16 a set lain ropui takin Thutak Nunpuitu Team an kir leh. 

Kum li chuang hnua TNT-in Pro Volleyball-a hnehna an chan hmasak ber a ni a, April 10, 2018 khan league inkhelah set thum set hnih (31-29, 19-25, 25-14, 18-25, 15-10)-in Tuichangral lakah an chak a, hemi hnu hian Spikers an hneh hma zawng khelh riat an tlawm zawn hman a ni.

Champion lai Chhinga Veng hmabak a hautak zui ve thung a, league tanna  inkhel hmasa berah 2019 final-a an hneh tawh Durtlang North-in set thum set hnihin an hneh tawh. Khelh hnih an tlawm zawnna niin semifinal lut thei turin khelh hnih an la neihah danglamna an thlentir a ngai.

Team panga inel zinga Mizo hlanga khel awm chhun TNT tan Buanga'n Pro Volleyball a khelh hmasak berah point 21 hmuin 11 a hloh a, D3 Business Player of the Night lawmman a dawng nghal a ni.

Coach thar Lalhmangaihsanga Sailo hovin Muanna Veng club-in inpumkhat leh phurna sang tak nen team thar an lantir. An zuang taimain net bulah lehlam vuak an dang tha hle a, inchhawk phurin nung takin an khel tluan.

Dinchhunga'n vawi 14 vaw tlain tum ruk a tisual a, Kawnpui tlangval Buanga nen mittlung takin an khel. Chhinga Veng tan Sujith Acharya chuan point 31 hmu mah se 21 a hloh a, Durtlang North nen an inkhelh tum ang bawkin team a chawi kang zo lo.

Set khatnaah Sujith-a hovin Spikers-in beiseiawm takin an khel a, mahse, set hnihna atangin TNT-in thawh hona tha tak nen tute pawh tangkai takin an inlan a, Chhinga Veng an zuih.

Feet 6 leh inchi 2-a sang Buanga a langsar a, tlar hma leh hnung atangin fuh tak takin a vua. Setter Lalliankima'n ball a vawrh tha a, 24-15-a hmahruaitu an nih laiin kum 22 mi Kawnpui spiker-in chiang takin a vaw tla.

Set thumna tirah Lalnunpuia'n point thum a hloh zawn hnuah 6-2-in TNT-in hma an hruai. Chhinga Vengin nawr letin captain Lallianmawia Pachuau leh Ramengmawia an chhawr bakah Sujith chuan hlap tlain 15-15-in an intluk a, 23-23 a ni leh.

Boruak sang leh inelna nasaah TNT an hriam a, captain Vanlalchhantluanga Sailo chuan vaw tlain Spikers-in an chhang let nghal thei lo va, Dinchhunga'n hlap tla ve lehin hun pawimawhah an mamawh point hnih an hmu zawn.

Set hnih an hloh zawn hnuah Chhinga Veng talbuaiin nuam ti takin TNT-in an khel zui a, inringtawk taka ball an vuak tlak bakah net bulah lehlam hlap an dang hneh hle bawk a, hneh takin set lina an thunun tluan.

Buanga leh Dinchhunga bakah Muanna Veng team tan Sadraka Fanai chuan point 11 hmuin point thum a hloh a, Zosangzuala'n point riat thawk chhuakin tum khat chiah a tisual a, Chhantluanga'n point hloh nei lovin vawi nga a hlap tla a, awmze neiin an khel.

Durtlang North an hneh loh tum aiin Chhinga Veng player-te an tlahniam a, Lianmawia'n point 11 hmuin tum ruk a tisual  a, Ramenga'n vawi riat hlap tla mah se point li a hloh bakah Nunpuia'n point nga a hmuh zat chiah a paih bawk.

El thama an inlan hnuah TNT-in Hunthar laka tlawm tawh Tuichangral hmachhawnin ningani zanah an khel leh dawn a, chak mamawh Spikers-in kar leh thawhtanni zanah Hunthar an bitum ang.

D3 Business Player of the Night

- Vanlalṭanchhana (TNT)

Play stats :

TNT

Vanlalṭanchhana : point hmuh 21, point hloh 11
Laldinchhunga : point hmuh 14, point hloh 6
Sadraka Fanai : point hmuh 11, point hloh 3
Zosangzuala : point hmuh 8, point hloh 1
Vanlalchhantluanga Sailo : point hmuh 5, point hloh 0

CHHINGA VENG SPIKERS

Sujith Acharya : point hmuh 31, point hloh 21
Lallianmawia Pachuau : point hmuh 11, point hloh 6
Ramengmawia : point hmuh 8, point hloh 4
Lalnunpuia : point hmuh 5, point hloh 5

FIXTURE :

May 10, thawhlehni -
8pm : Bungkawn v Bethlehem Vengthlang (hmeichhia)

May 11, nilaini -
8pm : Durtlang North v Hunthar (mipa)

May 12, ningani -
8pm : Tuichangral v TNT (mipa)

May 13, zirtawpni -
3pm : Kanan v Bethlehem Vengthlang (hmeichhia)
8pm : Durtlang v Bungkawn (hmeichhia)