UK-a lalna chang rei ber Queen Elizabeth II thinna chuan khawvel hmun hrang hrang-a sport kalah nghawng lian tak neiin, chawlh phah an awm nual. Tun tumah chuan sport hrang hrang miten amah an zahna, sunna leh thlana thu kan tarlang dawn a ni.   

Horse racing
Sir Francis Brooke chuan,"Ram mipuiin Lalnu ropui kan sun mek a, chutih rualin, sakawr intlansiak tuipui tute chuan kan supporter ropui ber kan chan ve bawk a ni,” a ti. 

Lalnu sakawr chuan zirtirtu Nicky Henderson chuan,” Racing chuan a thian tha ber a chan ta. Ram hian Lalnu kan chan a ni satliah lo va, ram hmangaihtu nu ropui ram tana chhiahhlawh nun pui ngam lalnu kan chan zawk a ni,” a ti. 

Football
    Europa League-a Manchester United leh Real Sociedad inkhelh hma khan lalnu zahna lantir nan ngawirengin minute khat an ding a, Premier League club zawng zawngin an club hmingin lalnu an ui thu an chhuah bawk. Premier League chuan ‘ni lungngaih thlak tawp’ a nih thu an sawi bawk. 

English Football League chair Rick Parry chuan,"Lalnu Elizabeth II, sunna kawngah hian khawvel leh ram chhung mipui te lungngaihna hi kan tawm pui dawn a ni,” a ti.  Premier League kar tawp inkhel tur zawng zawng pawh khelh a ni dawn rih lo. 

Europa Conference League-a, FCSB hnehtu West Ham United fans te chuan inkhelh a zawh rualin 'God Save The Queen' hla sa-in London Stadium-ah ngawi rengin minute khat an ding. 

England mipa leh hmeichhe captain Harry Kane leh Leah Williamson te pawhin, lalnu an ui thu hi an sawi chhuak a ni. England captain thin David Beckham pawhin "Lalnu hian he ram hi hmangaihna leh zahawmna in a hruai thin,” tiin a sawi. 

Motorsport
Formula 1 tum 7 world champion tawh Lewis Hamilton chuan Lalnu hi hruaitu ropui midang chawk phur thiam leh entawn tlak tak a nih thu a sawi.  Hamilton chuan,”A chanchin duhawm loh tak ka hriat rual khan, a nun ropui tak ka ngaihtuah chhuak a, mi tam tak tana beiseina siamtu a nih dan te, zahawmna, inpumpekna leh ngilneihna hmanga ram a hruai dang te hi a ropui a ni,” a ti. 

FIA president Mohammed Ben Sulayem pawhin, "Lalnu hi khawvel ram hruaitu zahkai ber a niin ka hria. FIA  chhungkua chuan Lal chhungkua, United Kingdom mipui leh Commonwealth ami zawng zawng te kan tawrpui tak zet a ni,” a ti bawk. 

Cricket
England leh Wales Cricket Board chuan,"Lalnu zahawm tak Elizabeth II thihna hi thil lungchhiat thlak tawp a ni," tiin thuchhuah an saim a. ECB chair Richard Thompson chuan,"Lalnu thih avang hian Cricket game chhungkua chuan hrehawm kan tiin kan tuar hle a ni. Lalnu kha, he game ngainatu leh support tu pawimawh tak a ni. A pasal boral ta nen khan cricket game hi an en dun fo thin a ni. Ram tana a thil tih zo zai te hi theihnghilh a ni ngai tawh lovang,” tiin a ui thu a sawi. 

Golf
Lalnu thin vang hian Wentworth-ah chuan an flag te chu a ngul chanveah khai niin BMW PGA Championship pawh chawl lailawk rih a ni. Royal and Ancient Golf Club captain Peter Forster chuan,"Golfer ni hauh lo mah se he club tan hian, Lalnu ropui hi kum 70 chhung zet patron a ni a ni a, kan tan chuan inchhuanna tham a ni,” a ti. 

2018 European Ryder Cup, Denmark captain Thomas Bjorn pawhin,"Ka puitlin hnuah England-ah ka cheng tam zawk a, khawvel hmun hrang hranga infiam mite phurna petu Queen Elizabeth II thinna hi pawi ka ti takzet a ni,” a ti.

Olympics
International Olympic Committee president Thomas Bach chuan,”Olympic movement leh sport support tu ropui ber kan chan a ni. Lalnu hi ram hruaitu te zinga Olympic tum hnih khuhhawnna nei thei awmchhun a nih bakah Olympic GamesLondon 1948-ah khan min telpui bawk a ni," a ti. 

Rugby League
Rugby Football League chair Simon Johnson chuan,"RFL leh Rugby League chhungkua zawng zawng aiawha ka sawi duh chu, ‘Kan thinlung chhungril ber atangin he thihna hi kan tuar takzet a ni’ tih hi,” a ti. 

Sawi zawmin "Rugby League hian kum 2016 thleng khan patron-ah kan hmang  a, ram leh he game tana a hnathawh ropui tak te hi kan chhuang takzet a ni,” tiin a ui thu a sawi. 

Tennis
Swiss legend Roger Federer leh Rafael Nadal te pawhin lalnu an tawrh puina hi an sawi chhuak tawh a, Tennis a ngainatna leh a zahawmna te chu hriat reng a ni tawh tur a nih thu an sawi. 

Lawn Tennis Association chief executive Scott Lloyd chuan a thuchhuahah,”Lalnu ropui hian, kum 70 chhung lalnu nia ro a rel chhung zawng khan midang tanpui leh tawiawmin a nun pum a hmang a ni. A thil tha tih tam tak avangin khawvel pum a midang tana rawng bawl thintu charity leh organisation te pawhin an zahin an chhuang takzet a ni,” a ti. 

Athletics
Olympic gold medal tum li awrh tawh Sir Mo Farah chuan,“Lalnu hi khawvel hmun tinreng a miten an ngaina a, mi tam tak tan mipawimawh tak a ni bawk,” a ti. 

Cycling
British Cycle khawltute hrang hrang pawhin an ui thu an sawi a, Olympic tum 6 champion tawh Sir Chris Hoy chuan,"Lalnu thihna vanga khawvel hmun hrang hrang leh Briton mipui te lungngaihna hi kan tawmpui ve a ni,” a ti.

Boxing
British heavyweight boxer Tyson Fury leh Anthony Joshua te pawhin an ui thu sawiin, Fury chuan lalnu lem hnuaiah “Zanin chu Lalnu tan ngaituahna leh tawngtaina nen Lalpa’n awmpui mawlh che rawh se,” a ti a, Joshua chuan,"Rest in peace" ti zawngin a ziak thung.