Mizoram Sports Minister Lalnghinglova (Tetea) Hmar chuan Olympic Games-a hlawhtlinna thlir chungin tun atanga hma lak a tul tawh tih a sawi.

Tetea hi Zirtawpnia Physical Education Foundation of India (PEFI) leh Sport India Foundation bultuma Pragati Maidan, New Delhi-ah Sport India Conference, 2024-ah khual lian a ni a, a hawnnaah thu a sawi.

Sports chu intihhlimna mai ni lo, thalaite eizawnna leh India ram tihhmingthatna hmanrua ni thei turin a ram pum anga inher rem a tul thu a sawi.

Mizoram dinhmun sawiin state lian lo tak ni mah se tun hnai kum 10 chhungin India ram football league sang, Indian Super League (ISL) leh I-League-ah player 192 a thawh thei tih a sawi.

“Sports-a hlawhtling tur chuan a thiam ber zinga tel a ngai a, Olympic-a hlawhtlinna thlir chungin tun atanga hma lak a tul tawh,” a ti.

Sports minister chuan India-in kum 2036 Olympic Games thlen a tum a, chumi atan a inbuatsaih nan Mizoramin Mizoram Sports Conclave a buatsaiha hma a lak tan tawh thu a sawi a. India rama infiamna lar ber, cricket thlauhthla chuang lovin India infiammite thatna Olympic sports discipline dangah nasa zawka tan lak a tul thu a sawi bawk.

Sport India Conference-ah hian sports inrelbawlna dikin ram economy-a hmasawnna a thlen theih dan thlirho a ni a. ‘Global Trends and Opportunities in Sports Management: Impact of Professional Leagues & Sports Tourism on Economic Development’ tih thupui hmangin state hrang hranga sports thuneitu te, sports industry leh private organisation lian te, sports university hotu lawk leh sports lama tui mite an tel.

Conference pual hian August 29–31, 2024 chhungin Pragati Maidan-ah tho Sports India Expo buatsaih niin India ram chhung leh pawna sports industry lianten an thil siamte an pho chhuak.

Tetea hi khuallian a nih bakah a buatsaihtute ngen angin panel discussion-ah a tel bawk.