Aizawl February 17, 2023: Vawiin khan ZPM chuan political session an nei a, Working President K Sapdanga chuan thu sawiin, "Sports chungchang resolution kha sports minister tihmualpho tumna resolution niin a lang. Ruling party ten resolution an pulut a, opposition te nen sports minister mawng an hlim ho ta a ni,” a ti.

Sapa chuan, “Tunlaia lar tak chu sports department a ni; session-ah a fakna resolution putluh a ni. MNF sawrkar fak tumna leh minister fak tumna ni angin lang mahse, an sawi enga lo lang chu sports minister tihmualpho tumna niin a lang. Sawihona ngaihthlak khan hei hi a lang thei tlat; ruling party ten thiam takin he resolution hi an pulut niin a hriat theih. He department hian sum an han hmang hnem khawp a, minister hian a remhriatna bakah zawl pachal tak a neiin niin a rinawm. Chung an sum hmanna te chu Utilization Certificate thehluh tur an nei lawi si lo a, chuvangin project thar an thehluh pawh sawrkar laipuiin an hnathawh hmasa te chingfel phawt tura tiin a lo dang tlat a ni. Hei hi mipuiin an hre lo a, mipui hriata sawichhuahna remchang a awm theih beiseiin, ruling party ten resolution an pulut ta a, opposition te nen sports minister mawng an hlim ho ta a ni," a ti. 

ZPM Working President chuan, "PMJVK a lar em em a, ramin a mamawh hmanhmawh deuh, hmasawnna pawimawh chi hrang hrang atana central sawrkar ruahman scheme atang ringawt hian sports hian Rs. Nuai 40,000 chuang an chang a ni. Hetiang khawpa sum a tam chung si hian sports association hrang hrang ten sum an dawn thin kha a hmu mumal ta lo a. Heti khawpa sports atana sum a len vel lai hian mipui mamawh atan sum a awm lo a, a huna hlawh pek tur an nei thei hek lo; a chang phei chuan hnathawkte hlawh a puk a ni. Central atanga sum lo kal te hi sport department-ah a khawhlut pur pur a, heng zawng zawng hi kan belhkhawm chuan Vbc 600 chuang sports atan an hmang a ni," a ti.

ZPM Working President chuan, “Kan sawrkar kal lai mek hi bihchian chuan suma lei sawrkar a ni ber a, sumin a tibuai a ni. Kum 25 chhung Congress leh MNF an insawrkar chhawk a, chutah mipuiin ningin an paihthla leh thin. Tun tum ministry hi mipuiten hun pek an tum tawh lo tih a hriat ta a, a chhan tam tak zinga a lian ber chu sum an atchilh lutuk hi a ni. Sum hi an hlepru mai ni lovin an thuktu a ni ber a, an cheziaah mipui lung a awi thei lo,” a ti a.