ZALEN, Nov. 12, 2024: June 13-14, 2024-a Aizawla Mizoram sorkarin Mizoram Sports Conclave a buatsaih zar zovin Mizo pahnih, Vanlalhmangaihzuali leh Joseph Vanlalpeka te chuan China-ah taekwondo zirna tur an hmu a, lehkha zir tel bawk turin an kal dawn.

Mizo player pahnihte hi Capital University of Physical Education & Sports, Beijing, China-a zir tur niin foreign sponsorship quota-a kal tur an ni.

Sponsorship hi Mizoram Sports Conclave-a tel, Grand Master Kim Hee do leh Grand Master Lee Jeong Hee ten Mizoram Olympic 2036 Vision a hlawhtlinna tura an buaipui a ni. 

Sponsorship hmuh a nih veleh hian Mizoram Amateur Taekwondo Association (MATA)-in dilna a hawng a, diltu eng emaw zat atangin grand master-ten tehfung chi hrang hranga endikin Hmangaihi leh Joseph-a te hi thlan an ni ta a ni.

India quota-a tling thei Mizo player pahnihte hi MATA player tha ve ve an ni a. New Diakkawn, Kolasib nula, Hmangaihzuali hi Kolasib Taekwondo Club atanga zir chhuak niin Goa National Games leh National Senior Championship hnuhnung berah khan gold medal a la ve ve.

Armed Veng South tlangval, Joseph-a pawh hi national junior champion lai niin Mizoram tan vawi tam tak medal a la tawh a. Exodus School Taekwondo Club-ah Taekwondo a zir mek. 

Beijing-ah hian ram dang atanga China-a zirte kalphung ang thovin kum khat chhung tawng (Mandarin) an zir phawt ang a, hemi chhung hian taekwondo an zirtir dawn a. Kum khat hnuah hian Bachelor of Arts (BA) an zir chhunzawm ang.

Ram pawna taekwondo zir tur pahnihte hi Thawhlehni chawhnu khan Sports Minister Lalnghinglova Hmar chuan a office chamber-ah fuihin a thlah a. An zirna leh ni tin nunah Mizo an nih hre renga Mizo nun zemawi vawng zel turin a chah a, pawisa fai a pai bawk.

Thawhlehniah vek hian School Education Dr. Vanlalthlana pawhin taekwondo zir turte lawmpuina leh fuihna neiin thilpek a hlan bawk.