Sports Minister Lalnghinglova (Tetea) Hmar chuan Mizoramin a tam thei ang ber national championship thlen a duh tih sawiin, “Chumi atana pawimawh ber chu standard size football field neih tam a ni,” a ti.

Tetea hian Nilaini tuk khan Environment, Forest & Climate Change Minister, Aizawl East I bialtu ni bawk, Lalthansanga nen Zembawk Football Field siam mek an tlawh a. Khawtlang hruaituten a zim deuh chungchang an sawi chu, “Zauh thei dan kawng dap ni se,” tiin a sum tumtu, Aizawl Smart City Ltd. hotute chu a theih anga hma la turin a hrilh nghal.

Tetea chuan Mizorama football khelmualte chu standard size tling a tlem a, standard size a nih loh chuan national tournament pawh duh anga thlen theih a ni lo tih sawiin, “National championship hi a tam thei an ber thlen theih kan duh a, chumi atana pawimawh ber standard size football field kan neih tam hi a ni,” a ti.

National championship thlen dawn chuan riahna tur neih that a ngai bawk tih sawiin, “Kan khelmualahte hian infiam mite thlen theihna hmunhma ngaihtuah tel a tul niin ka hria,” a ti bawk.

Zemabawk Football Field siam mek hi a dung metre 92 leh a vang metre 52 a ni a, khawtlang hruaitute hian minister-te hi standard football ground (metre 100X65) anga siam theih dan kawng awmte an lo sawipui a ni.

Sports minister hian Edenthar-a football field siam mek a en nghal a. Hei pawh hi a zim deuh avangin a zauh theih hret dante a en.

Zembawk Football Field siam hna hi NECS-in thawkin Edenthar-a mi hi Vinco Construction-in an thawk ve thung a, field pahnih siam hna hi Aizawl Smart City Ltd. sum hmanga thawh a ni.